"Mash’al" - tajribali klub" yoxud yana bir mahoratli futbolchi muborakliklar uchun o‘ynaydi
Muborakning "Mash’al" klubi Superligada munosib ishtirok etish uchun o‘z imkoniyatidan kelib chiqqan holda tarkibini kuchaytirishga harakat qildi va bir qator selektsiya ishlarini olib bordi.
Klub matbuot xizmati esa tajribali yarim himoyachi Dilshod Rahmatullaev bilan kelishuvga erishilganligini ma’lum qildi. 36 yoshli futbolchi "Mash’al" bilan bir yillik shartnoma imzoladi.
Tajriba va mahorat – jamoaga kuchli qo‘shimcha
Dilshod Rahmatullaev o‘z faoliyati davomida bir qator kuchli klublarda to‘p surib, O‘zbekiston chempionatida ko‘plab muvaffaqiyatlarga erishgan. U "Nasaf", "Paxtakor" kabi grand klublarda o‘zini ko‘rsatgan va terma jamoa sharafini ham himoya qilgan. Uning "Mash’al"ga kelishi jamoa o‘yinini yanada mustahkamlashga xizmat qiladi. Ta’kidlash joizki, Rahmatullaev oxirgi ikki mavsumni Samarqandning "Dinamo" klubida o‘tkazdi va hammasi bo‘lib, 32 ta uchrashuvda maydonga tushdi. O‘z hisobiga 4 ta gol va 8 ta assist yozdirib qo‘ydi.
Jamoaning yangi maqsadlari
"Mash’al" joriy mavsumda yuqori natijalar qayd etishni maqsad qilgan va transfer siyosati doirasida bir necha muhim kuchayishlarga erishdi. Dilshod Rahmatullaevning tajribasi yosh futbolchilarga ham katta yordam beradi. Har xolda undan klub rahbariyati, murabbiylar va albatta muxlislarning umidi katta. Dilshod esa tajribali va yoshi katta futbolchi sifatida jamoadoshlariga o‘rnak bo‘lishi kutilmoqda.
Dilshod Rahmatullaevning fikrlari
"Mash’al" – tajribali klub va uning muxlislari juda ishqiboz. Jamoa safiga qo‘shilganimdan xursandman va barcha bilan birgalikda yuqori maqsadlar sari intilaman", – dedi yangi futbolchi.
Muborakda yangi davr!
Jamoa muxlislari yangi futbolchining harakatlarini intiqlik bilan kutmoqda. "Mash’al" safidagi ilk o‘yinlardayoq Dilshod Rahmatullaev o‘zining o‘yini bilan ishonchni oqlashi kutilmoqda. Tabiiyki, muborakliklar amalga oshirilgan yangi transferlar va xususan Rahmatullaev selektsiyasida ham muvaffaqiyatlar keltirishiga umid qilmoqdalar.
Eslatib o‘tamiz, "Mash’al" yana bir tajribali futbolchi Shoxnazar Norbekov bilan ham shartnoma imzolagan bo‘lib, u Sports.uz saytiga bergan intervyusida sport formasini yuqori darajaga olib chiqish va murabbiylarning ishonchini qozonishga bor kuchi bilan harakat qilishini alohida ta’kidlab o‘tgan. Aytish lozimki, Rahmatullaev va Norbekovga ko‘p narsa bog‘liq. Ular "Mash’al"ning yangi etakchilari sifatida o‘zlarini ko‘rsatishlari talab etiladi.
Fikrlar