"Машъал" - тажрибали клуб" ёхуд яна бир маҳоратли футболчи муборакликлар учун ўйнайди
Муборакнинг "Машъал" клуби Суперлигада муносиб иштирок этиш учун ўз имкониятидан келиб чиққан ҳолда таркибини кучайтиришга ҳаракат қилди ва бир қатор селекция ишларини олиб борди.
Клуб матбуот хизмати эса тажрибали ярим ҳимоячи Дилшод Раҳматуллаев билан келишувга эришилганлигини маълум қилди. 36 ёшли футболчи "Машъал" билан бир йиллик шартнома имзолади.
Тажриба ва маҳорат – жамоага кучли қўшимча
Дилшод Раҳматуллаев ўз фаолияти давомида бир қатор кучли клубларда тўп суриб, Ўзбекистон чемпионатида кўплаб муваффақиятларга эришган. У "Насаф", "Пахтакор" каби гранд клубларда ўзини кўрсатган ва терма жамоа шарафини ҳам ҳимоя қилган. Унинг "Машъал"га келиши жамоа ўйинини янада мустаҳкамлашга хизмат қилади. Таъкидлаш жоизки, Раҳматуллаев охирги икки мавсумни Самарқанднинг "Динамо" клубида ўтказди ва ҳаммаси бўлиб, 32 та учрашувда майдонга тушди. Ўз ҳисобига 4 та гол ва 8 та ассист ёздириб қўйди.
Жамоанинг янги мақсадлари
"Машъал" жорий мавсумда юқори натижалар қайд этишни мақсад қилган ва трансфер сиёсати доирасида бир неча муҳим кучайишларга эришди. Дилшод Раҳматуллаевнинг тажрибаси ёш футболчиларга ҳам катта ёрдам беради. Ҳар холда ундан клуб раҳбарияти, мураббийлар ва албатта мухлисларнинг умиди катта. Дилшод эса тажрибали ва ёши катта футболчи сифатида жамоадошларига ўрнак бўлиши кутилмоқда.
Дилшод Раҳматуллаевнинг фикрлари
"Машъал" – тажрибали клуб ва унинг мухлислари жуда ишқибоз. Жамоа сафига қўшилганимдан хурсандман ва барча билан биргаликда юқори мақсадлар сари интиламан", – деди янги футболчи.
Муборакда янги давр!
Жамоа мухлислари янги футболчининг ҳаракатларини интиқлик билан кутмоқда. "Машъал" сафидаги илк ўйинлардаёқ Дилшод Раҳматуллаев ўзининг ўйини билан ишончни оқлаши кутилмоқда. Табиийки, муборакликлар амалга оширилган янги трансферлар ва хусусан Раҳматуллаев селекциясида ҳам муваффақиятлар келтиришига умид қилмоқдалар.
Эслатиб ўтамиз, "Машъал" яна бир тажрибали футболчи Шохназар Норбеков билан ҳам шартнома имзолаган бўлиб, у Sports.uz сайтига берган интервьюсида спорт формасини юқори даражага олиб чиқиш ва мураббийларнинг ишончини қозонишга бор кучи билан ҳаракат қилишини алоҳида таъкидлаб ўтган. Айтиш лозимки, Раҳматуллаев ва Норбековга кўп нарса боғлиқ. Улар "Машъал"нинг янги етакчилари сифатида ўзларини кўрсатишлари талаб этилади.
Фикрлар