"Машъал"нинг икки нафар етакчиси "Турон"га қўшилди

“Турон” клуби таркибини кучайтиришда давом этяпти. Sports.uz маълумотига қараганда, жамоага кеча икки нафар ўйинчи қўшилди. Булар “Машъал” клубининг етакчилари – ярим ҳимоячи Сардор Абдураимов билан ҳужумчи Хумоюн Муртазоев.

Ушбу футболчиларнинг “Машъал” билан амалда шартномалари бор. Аммо Муборак клуби бу ўйинчиларини “Турон”га трансфер қилмоқчи. Агар томонлар молиявий масалаларни келиша олса, Абдураимов билан Муртазоев иккинчи даврани “Турон” сафида ўтказишади.

Маълумот учун, Абдураимов “Машъал” таркибида 9 та ўйинда 1 та гол урган бўлса, Муртазоев 10 та учрашувда 2 та гол муаллифига айланди.

Дарвоқе, бугун “Турон” жамоаси Тошкентда “Навбаҳор”га қарши назорат баҳсини ўтказиши режалаштирилган.