Машҳур ҳужумчи суҳбатдан кейин Англияга бормайдиган бўлди

Италиянинг “Милан” клуби қанот ҳужумчиси Рафаэл Леау ёзда Англия Премьер-лигаси клубларидан келадиган ҳар қандай таклифларни рад этишни режалаштирмоқда.

Ҳозирда Леау шартномасининг тугашига икки йилга яқин вақт қолган. “Милан” келаси мавсум учун УЕФА Чемпионлар лигасига чиқа олмаган.

Яқинда футболчининг ўзи Премьер-лигани кўп кузатишини ҳамда “Манчестер Юнайтед” ва “Арсенал”га хайрихоҳлик билдиришини айтгани учун унинг кетиши ҳақидаги хабарлар кучайган эди.

Бироқ La Gazzetta dello Sport нашрининг ёзишича, Леау “Милан” клуби президенти маслаҳатчиси Златан Иброҳимович билан суҳбатлашган ва келаси мавсумда ҳам “россонерилар”га ёрдам беришга тайёр эканини билдирган.

Рафаэл Леау 2019 йилда Франциянинг “Лилль” клубидан “Милан”га ўтган эди. Шундан буён 26 ёшли португалиялик футболчи 291 та ўйинда майдонга тушиб, 80 та гол урди.