Мавсумнинг омадсиз клубидаги омадсиз ҳужумчи

"Челси" Премьер-лиганинг 34-турида "Арсенал"га қарши баҳс ўтказиб, 3:1 ҳисобида мағлуб бўлди. Мазкур ўйинда Фрэнк Лэмпард томонидан кутилмаган қарор қабул қилинди. Аниқроғи, Обамеянг 6 ой деганда биринчи марта асосий таркибда майдонга туширилди. Бир қарашда ҳаммаси яхши, "аристократлар"нинг майдонда ҳақиқий 9 лик ҳужумчиси бор. Шу пайтгача Хавертц бу вазифани бажариб келаётганди. У ажойиб футболчи, шерикларига яхши имкониятлар тақдим қила олади, бироқ жамоага барибир вазиятларни якунловчи ўйинчи керак эди. Сабаби, "Челси" февралдан бери бир ойда биттадан кўп гол ура олмапти. Обамеянг мавзусига қайтсак, у асосий таркибда ўйинга тушди. Аммо габонлик 45 дақиқа майдонда ҳаракатланди. Ундан ҳам ёмони, Обамеянг 7 марта тўпга тегинди. Шулардан 4 таси ўйинни бошлаб берувчи паслар (бу жамоа гол урдирганидан кейин майдон марказдан бериладиган пас). Бундай статистика олдин ҳам бўлган 6 ой олдин 32 ёшли ҳужумчи айнан "Арсенал"га қарши матчда бошланғич таркибда учрашувни бошлаган. Ўшанда у 9 марта тўпга тегинган эди. Умуман олганди, бу қўрқинчли статистика. Гол уриш учун тушурилган ҳужумчи зарба тугул, хавфли ҳужум ҳам уюштира олмади. Гап футболчининг ўзидами? ёки "Челси"да? Ахир Обамеянг бир йил аввал Хави қўл остида қандай ўйинлар кўрсатаётган эди. У "Барса" мухлисларини ёқимтойига айланди, Испаниядаги қисқа фаолияти давомида 13 та гол уришга муваффақ бўлди. 

Обамеянг мавсум бошида "Барселона"дан "Челси"га 12 миллион еврога ўтди. Мазкур трансфер клубнинг Левандовскини қўлдан чиқаргани ва унинг ўрнига зудлик билан ҳужумчи топиш кераклиги боис содир бўлди. Шу жойида савол туғилади. Музокаралар жараёнида Обамеянгга бошланғич таркиб кафолатланганмиди? яъни у иккинчи рақамли бўлиб келдими? ёки асосий ҳужумчи? Вазиятга бошқа томондан қарасак, "Барса"га янги страйкер келди. Левандовски мавсум давомида 90 дақиқа майдонда ҳаракатланиб келди. Депай ҳам кам ўйин амалиётидан нолиб, клубни тарк этди. Демак, Обамеянг Англияга захирадан ўтириб қолмаслик учун келган. Аммо Тухелнинг кетиши ҳаммасини ўзгартириб юборди. Бошида Обамеянгга мослашиб олиши учун кўп дақиқалар берилмаган бўлса, англиялик мутахассис қўл остида ҳақиқий захира футболчисига айланди. Уни ҳатто Чемпионлар лигасидаги қайдномадан ҳам чиқариб юборишди. "Челси" ҳужумчига қишда чиқиш эшикларини кўрсатди, лекин яхши вариант бўлмагани сабаб, Обамеянг қолиб, асосий таркиб учун курашмоқчи бўлди. Айнан у курашни бошлаган даврдан бери ҳужумчи 119 дақиқа ўйнади. Тухель даврида голлар уриб турган бўлса, ҳозир битта учрашувда 7 марта тўпга тегинмоқда. Курашувчанлик ва прессинглардаги ҳаракатларини айтмаса ҳам бўлади. У шунчаки кераксиз футболчига айланди қолди.

Каталонияликларда мавсум давомида Левандовскини ўрнини тўлдира оладиган ўйинчи топилмади. Полшалик ҳужумчи Ла Лигада тўпурар бўлсада, фантастик даврни ўтказаётгани йўқ. Демак, Обамеянгни ўтган ёзда чиқарган қарори ўзи учун ҳам, "Барса" учун ҳам минусга ишлади.

"Арсенал"га қарши ўйин габонликнинг ёзда кетишини англатади. Кам ўйин амалиёти унга таъсир қилган. Энди биз "Боруссия" ва "Арсенал"даги Обамеянгни кўришимиз учун вақт керак.

Суҳроб Холбеков