Мбаппега "аталган" пуллар Неймарга насиб қилиши мумкин

Неймар фаолиятини Саудия Арабистонида давом эттириши мумкин. Бундан аввалроқ ҳужумчи ПСЖ раҳбариятига клубни тарк этиш истаги борлигини айтгани ҳақида хабарлар тарқалган эди. Мъалум бўлишича, бразилиялик футболчининг трансферига "Ал-Ҳилол" қизиқмоқда.

Relevo нашри хабарига кўра, Саудия Арабистони клуби Неймар учун 200 миллион евродан ортиқ маблағ сарфлашга тайёр - бу суммага трансфер нархи ва футболчининг 3 йиллик маоши киради. "Ал-Ҳилол" бразилиялик футбол юлдузи учун аввалроқ Килиан Мбаппега таклиф қилган маблағнинг бир қисмини сарфлашни режалаштирмоқда.

Парижликлар Неймарни "Ал-Ҳилол"га қўйиб юборишга тайёр, чунки улар ҳужумчини Европа жамоасига сотмоқчи эмас. Футболчининг ўзи Саудия Арабистонига кўчиб ўтиш истиқболига шубҳа билан қарамоқда.

Неймарнинг эҳтимолий трансфери ҳақида ҳозирча аниқ маълумотлар йўқ. Ҳозир "Ал-Ҳилол" ва ПСЖ фақат Марко Верратти трансферини муҳокама қилмоқда. Тез орада Неймар бўйича музокаралар бошланиши кутилмоқда.