Мбаппенинг “Реал”га трансфери барбод бўлиш арафасида

“Реал” раҳбарияти ёзги трансферлардаги асосий мўлжали – Килиан Мбаппедан воз кечиши мумкин.

Гап шундаки, яқингача “Қироллик клуби” 23 ёшли ҳужумчини қўлга киритиши деярли ҳал қилинган масала сифатида баҳоланаётган эди. Бироқ ПСЖ хўжайинларининг сўнгги таклифи Мбаппени ўйлантириб қўйди.

Парижликлар истеъдодли ҳужумчисига икки йиллик шартнома ва йилига 40 миллион евро маош таклиф қилди. Бундан ташқари, улар футболчига 2023 йилнинг ёзида бошқа жамоага ўтиш имконини қолдирган.

Парижликлар бу шартномани ўйинчи текинга қўлдан чиқиб кетмаслиги учун бергани маълум. Қолаверса, Мбаппе яна бир йил ПСЖда қолган тақдирда “Реал”да икки мавсумда топадиган маошини қўлга киритади.

“Қироллик клуби” мутасаддилари агар Мбаппе келаси мавсум бошлангунича Мадридга кўчиб ўтмаса, бу трансфердан воз кечишини билдирган. Демак, танлов Килианнинг ўзида қолмоқда.