"Мени ўз сафида кўришни истаётганлар бор, аммо..." - "Сўғдиёна" дарвозабонининг режалари қандай?

Бир неча йиллардан буён “Сўғдиёна” дарвозасини муносиб қўриқлаб келаётган сербиялик тажрибали посбон Милан Митрович бу йил ҳам жиззахликларнинг муҳим ўйинчиларидан бири бўлиб қолмоқда. Табиийки, уни жамоада тутган ўрни ҳам катта.

Sports.uz журналисти эса Митровичдан биринчи даврадаги таассуротлар, бош мураббий Иван Бошкович ва яна айрим саволларга жавоб олди.

- “Сўғдиёна”нинг биринчи даврадаги иштирокини қандай баҳолайсиз?

- Мен бу ҳақида аввал ҳам айтганман, биздан асосий таркибда ўйнаган ўйинчилардан 5 нафари кетиб, янгилар келишди. Шунингдек, янги бош мураббий ҳам тайинланди. Хуллас, янги футболчилар-у, янги мураббийга мослашиш учун вақт керак бўлди. Ҳа, чемпионатни ёмон бошладик ва ўйлайманки, бизга омад кулиб боқмади. Қисқаси, бизни уйғота оладиган ва ишончни қайтарадиган инсон керак эди. Минимум даражада турнир жадвали ўрталарида бўлишимиз керак эди. Охирги ўйинни ютдик ва жадвалнинг қуйи қисмидан сал кўтарилиб олдик. Аммо, майли, бу футбол. Энди биз иккинчи даврага тайёрланяпмиз ва бу сафар омадимиз чопади, деб умид қилмоқдаман.

- Улуғбек Бақоев сизни “Бухоро”га чорлагани ростми?

- Мен буни на Улуғбек Бақоев ва на жамоадаги бошқа кимдандир эшитмадим. Буни биринчи марта сиздан эшитиб турибман...

- Сиз кўрган ва бирга ишлаган мураббийлар орасида Иван Бошкович нимаси билан фарқ қилади?

- У ёш ва малакали мутахассис. Бу мураббийни футболга ўз қарашлари ва тактикаси бор. У “Сўғдиёна”га келгач, жамоа қандай ўйин кўрсата бошлаганини ҳамма ва шу жумладан сиз ҳам кўрган бўлсангиз керак. Бошкович ёш футболчиларни яхши кўради ва барчага ўйнаш учун имконият беради.

- Шартномангиз чемпионат охирида тугайди-а? Кейинги режалар ҳақида ўйлаяпсизми?

- Ҳа, шартномам бу йил тугайди ва уни узайтириш масаласида ҳали клубдагилардан ҳеч ким билан гаплашганимча йўқ. Битимни узайтириш ёки узайтирмаслик - бу уларнинг иши. Ҳозиргача менда бир қатор вариантлар бор бўлиб, турли клублардан чақирувларни олмоқдаман. Мени ўз сафларида кўришни истаётганлар бисёр. Аммо барча хоҳиш-истагим “Сўғдиёна” билан боғлиқ бўлгани сабабли бу ҳақида ўйламагандим. Кўрамиз, йилнинг охирига бориб нима бўларкин... Жиддий таклиф бўлса ўйлаб кўраман ва бу хусусида клубдагилар билан гаплашиб олишим керак бўлади. Шунда бир қарорга келаман. Ҳозирча бор эьтиборимни чемпионатга қаратганман. Биз 2-даврага астойдил ҳозирлик қўриб, иложи борича олдинги йилларда қайд этилган яхши натижани такрорлашни истаймиз. Камида жадвалнинг ўрта поғоналаридан бирини эгалламоқчимиз.

- Биринчи даврадаги энг оғир ўйин қайси бўлди?

- “Қизилқум”га қарши беллашув энг оғири бўлди, дея оламан, ҳам ўйин, ҳам руҳий тарафлама! Бирор нимани режалаштирсанг, айнан шуни амалга ошириш қийин бўлади. Шукрки, ғалаба қозондик ва шундан кейин ютуқли сериямизни 4 та учрашувга етказа олдик. Умуман айтганда, жорий мавсумда ҳар бир рақибга қарши ўйин жуда мураккаб кўриниш олмоқда. Рақиблар ҳақида нима дейишим мумкин? Чемпионатни савияси анча ўсган. Ҳар бир жамоа билан ўйнаг қийин.

Шуҳратбек Жўраев.