Мераб Двалишвили: "Олдимда карьерамдаги энг қийин синовлардан бири турибди"

UFC собиқ чемпиони Мераб Двалишвили россиялик Пётр Янга қарши трилогия олдидан ўз фикрларини билдирди.

"Янга қарши иккинчи жангдан олдин кўпчилик: “Сен уни аллақачон енггансан, яна нимага керак бу баҳс?” деб гапирарди. Ҳамма яна ғалаба қозонишимни кутаётганди. Лекин мен учун бу жуда жиддий синов эканини яхши тушунардим. Пётр мен учун ҳеч қачон осон рақиб бўлмаган ва бўлмайди ҳам. Буни билардим, лекин барибир унинг қай даражада кучли экани, зарбалари қай даражада оғир тушишини жангда яна бир бор ҳис қилдим. Агар бу сафар жуда пухта, жуда тўғри тайёргарлик кўрмасам, ёмон ҳолатда октагонга чиқсам, у яна мени қаттиқ жазолаши мумкин.

Олдимда карьерамдаги энг қийин синовлардан бири турибди. Оддатда шундай вазиятларда, кучли рақиб ва катта имтиҳон кутганини билганимда ўзимни энг яхши томондан кўрсатаман. Аввалги жанг олдидан ҳам қаттиқ машқ қилганман, лекин етарлича дам олмасдан, охирига бориб ўзимни бутунлай чарчатиб қўйгандим", — дея таъкидлади Мераб Ариэль Хельванига берган интервьюсида.

Эслатиб ўтамиз, Двалишвили ва Пётр Ян тўқнашуви 7 декабрь куни "UFC 323" турнирида ўтказилади.