Месси Флоридадан ҳашаматли уй олди. У АҚШга кетадими?

“Барселона” етакчиси Лионель Мессининг оиласи Флорида штатидаги Санни-Айлс-Бич шаҳридан ҳашаматли уй сотиб олди.

Маълумотларга қараганда, уй сотиб олиш ишлари билан футболчининг отаси Хорхе Месси шахсан ўзи шуғулланган ва осмонўпар бинонинг тўққизинчи қаватини тўлиғича харид қилиш учун 7,3 миллион доллар тўлаган.

Мессилар оиласи бундан икки ярим йил муқаддам янги уйидан унчалик узоқ бўлмаган жойда Porsche Design Tower  иншоотидаги квартирани ҳам 5 миллион еврога сотиб олган эди. Уй савдоси масъулиятини тўлиғича Хорхе Месси ўз зиммасига олгани айтилмоқда.

Forbes нашри Лионель Мессини 2020 йилда энг кўп даромад олган уч спортчидан бири сифатида қайд этган. Машҳур футболчи ўтган мавсумда 104 миллион доллар ишлаб топган.