Месси: "Жаҳон чемпионатини яна ютишга ҳаракат қиламиз"

Аргентина терма жамоаси сардори Лионель Месси Жаҳон чемпионати олдидан ўз фикрлари билан ўртоқлашди.

Тажрибали ҳужумчи амалдаги жаҳон чемпионлари яна бош соврин учун кураш олиб боришини таъкидлади.

"Биз албатта ҳаракат қиламиз. Одамлар биз бор кучимизни беришимизга шубҳа қилмасликлари керак. Терма жамоада ўйнаган барча йилларим давомида шундай бўлган. Баъзан натижа чиқади, баъзан эса йўқ.

Сўнгги йилларда натижалар биз учун яхши кечди. Лекин ҳақиқат шуки, бу жуда қийин ва ҳар сафар янада қийинлашиб бормоқда. Биз бунга кўникиб қолганмиз ва мухлисларни ҳам шунга ўргатдик.

Яна бир бор шуни амалга оширишга уринамиз. Бу уддаланадими ёки йўқ — бу футбол. Аммо битта нарса аниқ: ҳеч кимга осон бўлмайди. Рақибларимиз ҳам бизни енгишда қийналади, чунки биз жуда рақобатбардош жамоамиз", — деди Месси.

Аргентина терма жамоаси Жаҳон чемпионати гуруҳ босқичида Жазоир (17 июнь), Австрия (22 июнь) ва Иордания (28 июнь)га қарши майдонга тушади.