Месси кетса, "Барселона"даги 10-рақамда ким ўйнайди?

“Барселона” форварди Мартин Брэйтуэйт агар жамоа сардори Лионель Месси клубдан кетса, ўз рақамини ўзгартирмоқчи.

20 Minutos тарқатган хабарга кўра, даниялик футболчи аргентиналик жамоадошига тегишли бўлган 10-рақамни олмоқчи. Айтиш лозимки, Брэйтуэйт январда жамоага келиб қўшилган пайтдаёқ, “Барса” раҳбариятига шу масалада мурожаат қилган. Яъни, у Месси фаолиятини якунлагач ёки жамоадан кетганда 10-рақамда тўп сурмоқчилигини очиқ айтган.

Аммо Мартиннинг жамоадаги тақдири ҳам ҳозир мавҳумлигича қолмоқда. Боиси, янги бош мураббий Рональд Куман уни ҳозирча жамоада олиб қолиш ёки қолмаслик масаласида бирор қарорга келгани йўқ.

Брэйтуэйт ўтган мавсум Ла Лигада 11 та ўйинда майдонга тушди ва ўз ҳисобига 1 та гол ҳамда 1 та голли узатма ёздириб қўйди.