Месси яна бир чўққини забт этди

“Интер Майами” форварди Лионель Месси МЛСнинг навбатдаги турида “Орландо Сити” жамоаси дарвозасини икки маротаба ишғол қилиб, майамиликларнинг 5:0 ҳисобидаги ғалабасига катта ҳисса қўшди.

Статистика мутахассисларининг маълум қилишича, аргентиналик юлдуз миллий чемпионатларда киритган голлари сонини 500 тага етказиб олди.

Лионель Месси “Барселона”да ўйнаб юрган даврларида Испания чемпионатида 474 та гол урган. Шунингдек, икки мавсум давомида Франция чемпионатида ПСЖ учун 22 та тўп киритди. Ниҳоят, АҚШга кўчиб ўтганидан кейин МЛСдаги голлари сонини тўрттага етказиб олди.

Лионель Месси умумий ҳисобда клублар миқёсида жами 891 маротаба майдонга тушиб, 722 та гол ва 345 та ассист муаллифи бўлган.