"Металлург" янги ўйинчилар билан келишувларга эришмоқда

Қишки тайёргарлигини олиб бораётган «Металлург» футболчилари куни кеча жисмоний тайёргарлик бўйича норматив тестларни топширишди. Олдин хабар берганимиздек, таркибда бошқа клублардан бир қатор ўйинчилар жалб этилганди. Ҳозирги кунда эса уларнинг аксарияти билан келишувларга эришилди.

Лекин тарк этаётганлар ҳам учраб турибди. Масалан, клубнинг кўп йиллик ҳужумчиси Зоҳид Абдуллаевнинг жамоа билан хайрлашиб «Қўқон-1912»га йўл олганини айтишимиз мумкин. Бекободликлар устози Андрей Шипилов эса унинг ўрнини тўлдириш ва олдинги чизиқни кучайтириш учун янги ўйинчиларни таклиф қилаётганди. Шу мақсадда жалб этилган «Бухоро» ҳужумчиси Мурод Бобожонов, «Андижон» тўпурари Шаҳзод Убайдуллаев ҳамда «Динамо» аъзоси Ихтиёр Тошпўлатов янги мавсумни «Металлург»да бошлашлари аниқ бўлди.

Шунингдек, ҳужумкор ярим ҳимоячи Абдураҳмон Абдулҳақов ҳам эндиликда «Металлург» либосида ўйнайди. Ёдингизда бўлса, у ўтган мавсумда Убайдуллаев билан бирга «Андижон»да тўп сурганди. Шунингдек, «Бухоро»дан чақирилган ярим ҳимоячи Саламат Қуттибоевнинг ҳам «Металлург»да фаолият олиб бориши ҳал бўлди. Бундан ташқари, «Насаф»дан таклиф этилган Дониёр Нарзуллаевнинг ҳам янги мавсумни Бекободдла ўтказиши маълум бўлди. Дарвоқе, «Бунёдкор»ни тарк этган легионер Евгений Чумакни ҳам «Металлург»да шуғулланаётгани ҳақида хабар бергандик. Маълум бўлишича, у ҳам янги мавсумни бекободликлар сафида бошлайдиган бўлган. Таркиб анча-мунча шакллантирилганч, эндиликда футболчиларнинг ўйин амалиётини ошириш учун назорат учрашувларига кўпроқ эътибор берилмоқда.