"Металлург"нинг бу турдаги рақиби "Қўқон-1912" ҳақида

Бугун Суперлига 4-тур доирасида “Қўқон 1912” - "Металлург" баҳси ўтказилади. Бекободликлар матбуот хизмати учрашув олдидан рақиб ҳақида маълумотларни тақдим этди.  

“Қўқон 1912” жамоасига ўтган асрда – 1912 йилда асос солинган. Жамоа турли йилларда “Меҳнат”, “Автомобилчи” номлари билан мусобақаларда қатнашиб келган. Мустақил чемпионатларимизда эса 1992 – 2001 йиллар оралиғида олий лига баҳсларида “Темирйўлчи” номи остида иштирок этган. Ўзбекистон кубогининг биринчи финалчиси. 2002 йилдан қуйи лигага тушиб кетди ва “Қўқон” (2002-2008), “Бунёдкор-Қўқон” (2009-2011) номлари остида кучлилар сафига қайтишга ҳаракат қилди. 2012 йилдан “Қўқон 1912” номини олган жамоа 2015 йилдан яна олий лигада иштирок этиб келаяпти.

Шу йиллар давомида “Қўқон 1912” жамоаси кучлилар сафида 483 та учрашув ўтказди. Мазкур ўйинларнинг 174 тасида ғалаба қозонди, 80 учрашувда дуранг қайд этди, 229 ўйинда эса имкониятни бой берди. Киритилган ва ўтказиб юборилган тўплар фарқи: 641-841. Жамоанинг энг йирик ғалабаси – 5:1 (1992 – “Янгиер”, 1999 – “Металлург”, “Андижон”), энг йирик мағлубияти – 1:7 (2000 – “Пахтакор”, 2019 – АГМК).