Мезбон Германия турнирга ёмон кайфиятда етиб келаётган Шотландияга қарши! (превью)

Хабарингиз бор бугун, яъни 14 июнь куни Германияда Евро чемпионатига старт берилади. Очилиш баҳсида мезбонлар Шотландияга қарши майдонга тушади. 

Учрашувлар тарихи:

Германия ўз тарихида бир маротаба Шотландияга мағлуб бўлган. Бу воқея 1999 йилда ўтказилган ўртоқлик ўйинида содир бўлганди. Шундан бери немислар таслим бўлмайди. Аммо бу икки жамоа бир-бирига тўқнаш келганида йирик ҳисоблар қайд этилмаган. Сўнгги беллашувда эса Германия 3:2 ҳисобида зафар қучган. 2016 йилги Евро турнири учун саралаш босқичида бу икки мамлакат бир гуруҳдан ўрин олган. Биринчи таймнинг ўзида дарвозалар 4 марта ишғол қилинган бўлса, иккинчи бўлим бошида Илкай Гюндоганнинг голи эвазига Йохан Лёв шогирдлари 3 очкони қўлга киритган. 

Германия:

Германия ўз давлатида ўтадиган чемпионат учун муносиб иштирок этишни мақсад қилган. Шу сабабли, раҳбарият Ханс-Дитер-Фликни ўз лавозимидан озод қилишга қарор қилди. Шу билан бирга, Юлиан Нагельсманни вақтинчалик мураббий сифатида таништирди. Бу эса мухлисларда озгина бўлса ҳам, ишончни камайишига сабаб бўлди. Аммо Франция, Нидерландияга қарши ўртоқлик ўйинларида собиқ "Бавария" устози билан ишлашни давом эттириши кераклигини тушунишди ва шартнома янгиланди. Энди Германия турнир фаворитлари қаторида кўрсатилмоқда.

Шотландия:

Топ жамоаларга қарши осонликча мағлуб бўлишни истамайдиган Шотландия турнир олдидан бироз кайфиятини тушириб қўйди. Стив Кларк шогирдлари саралаш ўйинларини жуда зўр бошлади, лекин охирида Испанияга биринчи ўринни бой бериб қўйди ва сўнгги ўртоқлик учрашувларида омадсизликка учради. Шотландия Гибральтарни ҳисобга олмаганда, охирги марта 2023 йилнинг сентябрида ғалаба қозонган. Бу эса жамоанинг руҳий ҳолати ҳам ёмон бўлиши мумкинлигини билдиради. Шундай экан, шотландлардан биринчи турда нимадир кутиш қийин. 

Тахминий таркиблар:

Германия: Нойер, Киммих, Рюдигер, Та, Максимилиан, Андрих, Кроос, Мусиала, Гюндоган. Вирц, Хаверц. 

Шотландия: Ганн, Ральстон, Портеоус, Хендри, Тирни, Робертсон, Мактоминай, Гилмур, Макгрегор, Макгин, Адамс.