
"Милан" бош мураббийи билан шартномани бекор қилиши мумкин
Сержиу Консейсау атиги бир ой олдин "Милан" бош мураббийи этиб тайинланган эди. Орадан бир неча кун ўтиб, португалиялик мутахассис "россонери" билан Италия Суперкубогини қўлга киритди. Бироқ "Tuttosport" нашрининг хабарига кўра, Консейсау билан шартнома бекор қилиниши мумкин.
Одатда мураббийлар ёмон натижалар туфайли истеъфога чиқарилади, аммо бу ҳолатда сабаб бошқа. "Милан"да Консейсаунинг қатъий феъл-атвори туфайли жиддий таранглик юзага келган. Яқинда у Давид Калабрия билан майдонда баҳслашиб қолди. Кейин эса Алваро Мората клубдан кетиш истагини билдирди, чунки испаниялик футболчи португалиялик мураббий билан ишлашни истамайди.
Манбага кўра, футболчиларнинг бундай норозилиги Консейсаунинг истеъфосига олиб келиши мумкин. Унинг келажаги 2-феврал куни бўлиб ўтадиган "Интер"га қарши дерби натижасига боғлиқ бўлиши кутилмоқда.
Фикрлар