"Милан" Гаттузонинг ўрнига янги мураббий изламоқда

Мавсум якунлангач жамоа бош мураббийи Женнаро Гаттузо клубни тарк этиши мумкин. La Gazzetta dello Sport нашри хабар беришича, номзодлар орасидан "Рома" собиқ бош мураббийи Эусебио Ди Франческо ва "Аталанта" бош мураббийи Жан-Пьеро Гасперинилар ўрин олишган. Бу икки мутахассис "Милан"нинг ёш футболчилари билан яхши ишлаши ва жамоа ўйин услубини ўзгартира олиши мумкинлиги иддао қилинмоқда.

Шунингдек, кенгайтирилган рўйхатдан Леонардо Жардим ("Монако") ва Марко Жампаололар ("Сампдория") жой олган. Аммо, уларнинг жамоага таклиф қилиш эҳтимоли у қадар юқори эмас.

Илгарироқ, Гаттузонинг ўрнига мавсум оралиғида "Челси" клуби устози Маурицио Сарри келиши борасида хабарлар тарқалган эди. Бироқ италиялик мутахассиснинг ўзи Лондон клубини тарк этиш истагида эмас ва бу ҳақда "Милан" раҳбариятини огоҳлантирган.