Миржалол Қосимов - “Қўқон-1912" жамоасига қойил қолгани, 2:0 ҳисобини нега ёмон кўриши ва Турсуновнинг дахшатли голи ҳақида

АГМК - "Қўқон-1912" учрашувидан кейинги матбуот анжуманининг иккинчи қисмида мезбонлар устози Миржалол Қосимов қатнашди. Бу ҳақда "Қўқон-1912" клуби матбуот хизмати хабар берди.

- Ўйин жуда ҳам шиддатли ва жанговар тарзда кечди. Ушбу жамоалар турнир жадвалида иккинчи ва учинчи ўринларда боришаётганди. Шу боисдан биринчи бўлиб гол урган жамоа ғалаба қозониши керак эди. Иккинчи бўлимда омадимиз келди. Ўйинни бироз кучайтирдик ва тезда биринчи голни уриб олдик. Иккинчи голда эса менимча, Санжар ростдан ҳам йил голини урди. Шундай чиройли голи билан у жамоамизга ғалаба келтирди. 2:0 ҳисобини ёмон кўраман. 1:0 пайтида жамоа эҳтиёткорликни кучайтиради. Шунингдек, "Қўқон-1912" жамоасига ҳам қойил қолдим, улар икки тўп фарқи бўлишига қарамасдан охиригача курашишди. Бундай ўйинлар орқали нафақат футболчилар, балки мухлислар ва ўзбек футболи ҳам ютади.

Футбол шундай нарсаки, ҳужумчи чап қанот ҳимоясида чап қанот ҳимоячиси бўлиб ўйнаши керак. Ҳимоячи эса ҳужумда ҳужумчи бўлиб ўйнай олиши лозим. Қачонки футболчилар доимо бир-бирининг ўрнини тўлдириб юрса, футбол янада чиройли бўлади.

Сайдуллода сариқ карточка бор эди. Шу сабабдан уни алмаштирдим. Негаки, тезкор футболчи катта тезлик билан югуриб кетаётган пайтда йиқитилса, иккинчи сариқ ва бу қизилга айланиб кетиши мумкин эди.

Ҳозирги замонавий футболда ғалабага эришиш жуда қийин. Ундан ташқари, бунинг учун катта меҳнат қилиш керак. Шу орқали инсон хурсандчиликни ўзига тақдим қилади.

Қўқонликларнинг "Бунёдкор"га қарши ўйинини биз кўриб чиқдик. Улар меҳмонда ўйнаганини инобатга олсак, Ашурматов шогирдлари унчалик ҳимоявий ўйнагани йўқ. Сўнгги дақиқаларда бўлган автогол эса футболнинг бир қисми.

"Қўқон-1912"нинг бугунги ҳужумкор ўйини бизга сюрприз бўлмади. Ундан ташқари жамоа икки нафар таянч ярим ҳимоячи билан ўйнади. Ўша “Бунёдкор”га қарши беллашувда ҳам иккинчи бўлим давомида схемалар ўзгарганди. Бу футболда тез-тез учраб турадиган, мураббийнинг фалсафаси, - деди Миржалол Қосимов.