Миржалол Қосимов: "Биргина хато қимматга тушиши мумкин"

Ўзбекистон кубоги нимчорак финалидан ўрин олган АГМК - "Металлург" ўйини якунига етди. Унда асосий вақт 1:1 ҳисобида якунланди. Қўшимча таймларда эса мезбонлар яна икки гол уриб, 3:1 ҳисобида ғалаба қозонди. 

Олмалиқ клуби сафида голларга Санжар Турсунов, Акром Комилов ва Миржаҳон Мираҳмадов муаллифлик қилди. Меҳмонларнинг голи Бектемир Абдуманнонов номига қайд этилди. 

Беллашувдан сўнг олмалиқликлар устози Миржалол Қосимов мазкур баҳс борасида ўз фикрлари билан ўртоқлашди: 

- "Бугун олдимизга қўйган мақсадга эришдик. Умуман олганда, яхши ўйин бўлди. Экстра таймлар бўлгани ҳам бунга исбот. Учрашувни яхши бошлай олмадик. Дастлабки 25 дақиқада ўйинимиз қовушмади. Ўттизинчи дақиқалардан сўнг ўйин тизгинини қўлимизга олган ҳолда, тўпни назорат қилдик.

- Иккинчи бўлимда ҳам устунлик биз томонда эди. Бироқ биргина хато қимматга тушиши мумкин эди. Шунга қарамасдан, йигитлар охирги дақиқагача курашди ва керакли натижаларга эришди. Биз мухлислар учун ўйнаймиз. Барча мухлисларимизга бизни қўллаб-қувватлаганликлари учун раҳмат айтаман. Бундан кейин ҳам бизга мухлислик қилишларини сўраб қоламан. 


                                                                                                                                        Манба: АГМК матбуот хизмати