Миржалол Қосимов: Футбол шашка эмас, ўйин пайтида жанжалли ҳолатлар бўлиб туриши табиий ҳолат

Бугун Ўзбекистон Суперлигаси 20-тури доирасидаги "Сўғдиёна" - АГМК баҳси бўлиб ўтди. Ўйиндан кейин меҳмонлар бош мураббий Миржалол Қосимов ўйин ҳақида ўз фикрларини билдириб ўтди:

"Беллашув ҳақида гапирадиган бўлсам, биз кутгандек жанговор ва кескин курашларга бой ўйин бўлди. Ҳар икки жамоа ҳам ғалаба учун майдонга тушган эди. Бироқ омад бизга кулиб боқди. "Сўғдиёна" жуда яхши шаклланган клуб ҳисобланади. Таркибда иқтидорли ва тажрибали футболчилар етарлича.

Айтиб ўтиш керакки, бугун дарвозабонимиз Ботирали Эргашев жуда яхши ҳаракат қилди. Биринчи бўлим бошида бир қанча вазиятларда жамоасини яққол голдан сақлаб қолди. Биз эса ўзимизда бўлган имкониятлардан яхши фойдаландик. Иккинчи бўлим ҳам кескин курашларга бой бўлди. Дарвозамизга пенальти белгиланган эди, аммо яна Ботирали катта саҳнага чиқди. Айтишим мумкинки, ким гол урса, ўша жамоа ғалаба қозонади. 

Ушбу баҳс тарихда қолди. Энди кейинги ўйинларга тайёргарлик кўришимиз зарур. "Сўғдиёна"га эса Ўзбекистон кубоги ярим финал баҳсида омад тилайман. 

Охирги пайтларда Суперлигадаги ўйинлар жуда қизиқарли кечмоқда. Ҳар бир жамоа майдонга фақат ғалаба учун ҳаракат қилмоқда. Ҳеч бир футболчи ютқазгиси келмайди, шу боис, футболчилар ўйин пайтида жуда кўп тортишиб қолмоқда. Бу футбол учун нормал ҳолат ҳисобланади, менимча. Олдин ҳам айтганман: футбол шашка эмас. Ўйин пайтида жанжалли ҳолатлар бўлиб туришига кўникишимиз керак", - деди АГМК устози Миржалол Қосимов. 

Маълумот ўрнида, бугунги ғалабадан кейин АГМК ҳисобидаги очколар сони 32тага етди. Ҳозирда улар турнир жадвали 4-поғонасидан жой олган.