Миржалол Қосимов Мустақил Ўзбекистоннинг дастлабки 10 йиллигидаги энг яхши спортчиси, деб топилди

Ўзбекистон Миллий олимпия қўмитаси яқинлашиб келаётган Мустақиллигимизнинг 29 йиллиги муносабати билан ўзининг телеграмдаги расмий саҳифасида махсус сўровнома ўтказди. Унга кўра, дастлабки 3 ўн йиллик учун энг яхши спортчилар саралаб олинди ва номзодлар рўйхати овоз бериш учун эълон қилинди.

10-14 август кунлари роппа-роса 5 сутка давом этган дастлабки танловда 1991-2000 йиллардаги энг яхши 5 нафар спортчи номи овозга қўйилди. Ушбу вақт орасида 7822 нафар ҳамюртимиз овоз бериш жараёнида қатнашди ва афсонавий футболчимиз Миржалол Қосимов 2644 овоз (34%) билан биринчи ўринни қўлга киритди. Миржалол Қосимовга бу борада машҳур боксчимиз Муҳаммадқодир Абдуллаев номзоди катта рақобат туғдирди. Якунда футболчимиз 1 фоиз фарқ билан устун келди.

Иштирокчилар сони: 7822

1-ўрин: Миржалол Қосимов – 2644 овоз (34%)

2-ўрин: Муҳаммадқодир Абдуллаев – 2601 овоз (33%)

3-ўрин: Артур Григорян – 1005 овоз (13%)

4-ўрин: Лина Черязова – 948 овоз (12%)

5-ўрин: Армен Багдасаров – 624 овоз (8%)

Маълумот учун, Миржалол Қўшоқович Қосимов 1970 йил 17 сентябрда Тошкент шаҳрида туғилган. Футбол бўйича ўсмирлар ўртасида жаҳон ва ёшлар ўртасида Европа чемпиони, XII Осиё ўйинлари ғолиби, 4 карра Ўзбекистоннинг энг яхши футболчиси. Ўзбекистон республикасида хизмат кўрсатган спортчи. Футболчилик фаолияти давомида Давлатимиз томонидан муносиб тақдирланган. Жумладан, «Ўзбекистон ифтихори» фахрий унвони, «Шуҳрат» медали, «Фидокорона хизматлари учун» ва «Меҳнат шуҳрати» орденларининг соҳиби. Ҳозирда АГМК клуби бош мураббийи.