Mirjalol Qosimov Mustaqil O‘zbekistonning dastlabki 10 yilligidagi eng yaxshi sportchisi deb topildi

O‘zbekiston Milliy olimpiya qo‘mitasi yaqinlashib kelayotgan Mustaqilligimizning 29 yilligi munosabati bilan o‘zining telegramdagi rasmiy sahifasida maxsus so‘rovnoma o‘tkazdi. Unga ko‘ra, dastlabki 3 o‘n yillik uchun eng yaxshi sportchilar saralab olindi va nomzodlar ro‘yxati ovoz berish uchun e’lon qilindi.

10-14 avgust kunlari roppa-rosa 5 sutka davom etgan dastlabki tanlovda 1991-2000 yillardagi eng yaxshi 5 nafar sportchi nomi ovozga qo‘yildi. Ushbu vaqt orasida 7822 nafar hamyurtimiz ovoz berish jarayonida qatnashdi va afsonaviy futbolchimiz Mirjalol Qosimov 2644 ovoz (34%) bilan birinchi o‘rinni qo‘lga kiritdi. Mirjalol Qosimovga bu borada mashhur bokschimiz Muhammadqodir Abdullaev nomzodi katta raqobat tug‘dirdi. Yakunda futbolchimiz 1 foiz farq bilan ustun keldi.

Ishtirokchilar soni: 7822

1-o‘rin: Mirjalol Qosimov – 2644 ovoz (34%)

2-o‘rin: Muhammadqodir Abdullaev – 2601 ovoz (33%)

3-o‘rin: Artur Grigoryan – 1005 ovoz (13%)

4-o‘rin: Lina Cheryazova – 948 ovoz (12%)

5-o‘rin: Armen Bagdasarov – 624 ovoz (8%)

Ma’lumot uchun, Mirjalol Qo‘shoqovich Qosimov 1970 yil 17 sentyabrda Toshkent shahrida tug‘ilgan. Futbol bo‘yicha o‘smirlar o‘rtasida jahon va yoshlar o‘rtasida Evropa chempioni, XII Osiyo o‘yinlari g‘olibi, 4 karra O‘zbekistonning eng yaxshi futbolchisi. O‘zbekiston respublikasida xizmat ko‘rsatgan sportchi. Futbolchilik faoliyati davomida Davlatimiz tomonidan munosib taqdirlangan. Jumladan, «O‘zbekiston iftixori» faxriy unvoni, «Shuhrat» medali, «Fidokorona xizmatlari uchun» va «Mehnat shuhrati» ordenlarining sohibi. Hozirda AGMK klubi bosh murabbiyi.