Миржалол Қосимов янги мавсумга тайёргарлик ва янги футболчи билан шартнома имзолангани ҳақида гапирди

Суперлиганинг янги мавсумига тайёргарликни бошлаган ОКМК жамоасининг машғулотларидан Sports.uz сайти репортаж тайёрлади. Унда олмалиқликлар бош мураббийи Миржалол Қосимов интервью бериб, жамоага янги дарвозабон қўшилганини маълум қилди.

— "Икки ҳафталик таътилдан сўнг жамоамиз билан қисқа, 10 кунлик тикланиш йиғинига йиғилдик. Аввало, футболчиларни дам олишдан кейин жисмоний ҳолатини тиклаб олишни мақсад қилдик. Янги мавсумга мўлжалланган ўқув-йиғин машғулотлари 21 декабрдан 30 декабргача давом этади", — деди мутахассис.

Жамоанинг етакчи футболчилари кетиши ҳақида:

— "Футболчиларнинг жамоани тарк этиши ҳар бир клубда учрайдиган ҳолат. Етакчи ўйинчиларимизга бошқа жамоалардан яхши таклифлар тушгани сабабли кетишди. Бу табиий жараён. Ростдан ҳам энг кучли футболчиларимиз — Хуршид Ғиёсов, Ойбек Рустамов ва Рубен Санчес жамоани тарк этди. Шунга қарамай, жамоа ғалабалар учун курашади", — деди Қосимов.

Дарвоза чизиғидаги муаммолар ҳақида:

— "Дарвозабонлар билан боғлиқ муаммо фақат бизнинг жамоада эмас эди. Имкон қадар буни тўғрилашга ҳаракат қилдик. Шу сабабли дарвозабонлар мураббийи Денис Иванковни жалб этдик. Қолаверса, яна бир дарвозабон — Умид Эргашев билан шартнома имзоладик. Ҳар бир позицияда рақобат бўлиши керак. Рақобатда ким энг яхши бўлса, ўша дарвозани қўриқлайди".

Шунингдек, бир нечта футболчиларнинг интервьюлари ва машғулот жараёнидан олинган видеоларни Sports.uz’нинг YouTube канали орқали томоша қилишингиз мумкин.