Мирзакамол Неъматов: "Боксни ташлаб, ишлашга мажбур бўлганман"

Юртимиз профессионал боксида ҳам кўплаб истеъдод вакиллари етишиб чиқмоқда.  Аксарияти хориж промоутерлик компаниялари билан шартнома имзолаб улгурган бўлса, кўпчилик қисми маҳаллий промоутерлар кўмагида фаолият юритмоқда. 

Ана шундай маҳоратли вакилларимиздан бири Мирзакамол Неъматовдир. Ушбу боксчимиз ҳам профессионал фаолиятини бошлаганига кўп бўлмаган бўлса-да, аста-секин ғалабали юришини давом эттиряпти.

Биз бугун мазкур боксчимиз билан бўлган суҳбатни эътиборингизга ҳавола этамиз. 

Sports.uz маълумотномаси

Мирзакамол Неъматов 1997 йил 11 май куни Фарғона вилояти, Бешариқ тумани, Рапқон қишлоғида таваллуд топган. Бокс билан 2009 йилдан буён шуғулланиб келади. Биринчи мураббийи Зоиржон Усмонов. Ҳаваскор бокс бўйича ёшлар ўртасида бир неча бор мамлакат чемпионати ғолиб ва совриндорлари қаторидан жой олган. Профессионал боксдаги натижаси 9-1, WPBF (Минтақавий) чемпионлик камари соҳиби саналади. Менежери ҳамда промоутери Умиджон Ўринов ва Жўрабек Чўлпонов.

- Суҳбатни бокс оламига кириб келишингиз тарихи билан бошласак,  одатда болаларнинг яккакураш билан жиддий шуғулланишига қандайдир сабаблар бўлади?

- Аввало,  бу спорт турига ўзимда қизиқиш юқори бўлган. Қолаверса,  болаликда мактабда,  кўчаларда жуда кўп жанжаллашиб келардим.  Шунинг учун бувим мени бокс тўгарагига боришимни ва жиддий тарзда шуғулланишим кераклигини айтган.  Шу билан боксга қадам қўйганман.  Ўшанда 5-синф эдим.

- Сиз ҳаваскор йўналишда ёшлар ўртасида салмоқли натижалар қайд этгансиз,  нега ушбу йўналишда фаолиятингизни жиддий олиб бормагансиз? 

- Тўғри, ҳаваскор бокс бўйича ёшлар ўртасида Ўзбекистон чемпиони бўлганман. Халқаро турнирлар ғолиб ва совриндори бўлганман. Бироқ, ёшлар тоифасида фаолият юритиб, энди катталарга ўтадиган вақт молиявий қийинчиликлар юзага келган ва боксни ташлаб ишлашимга тўғри келган. Шунинг учун катталар ўртасидаги мусобақаларда иштирок эта олмагандим.

- Келинг,  ёшлар ўртасидаги фаолиятингизга тўхталсак, ўша вақт мамлакат чемпионатларида сизга жиддий рақобатчи ва ноқулай рақиб кимлар эди?

- Андижонлик Султонмурод Омонов, Тошкент вакили Элдор Мержанов ва қўқонлик Козимбек Мардонов бўлган. Улар орасида энг ноқулайи Козимбек Мардонов эди.

- Профессионал боксда фаолиятни бошлашингизга қандай воқелик асосий сабаб бўлганди?

- Ҳаваскор боксни тўхтатганимдан сўнг, 3-4 йил ишлаб юрганман. Ўша вақтлар Тошкентда қурилиш соҳасида тадбиркорлик қиладиган қариндош акамни олдига борганман. Акам яна боксга қайтишимга сабабчи бўлган. Барчасини қилиб бераман, сен шуғуллан ва яхши натижалар қайд этсанг, фақатгина хурсанд бўламан, деганидан кейин профессионал фаолиятни бошлашга қарор қилдим. Ўзим ҳам бошқа соҳада бирор натижа қилишга, молиявий имкониятимни яхшилашга у қадар ишонмадим. Чунки бокс барибир ўзига тортаверарди. Онам ҳам Олимпиада чемпионларини кўрса, сени ҳам шундай натижаларга эришишингни хоҳлардим, деб кўп айтарди. Ишлаб юрганимда дўстларимга профессионал боксга ўтиб, насиб қилса чемпион бўламан, дердим. Шулар асосий сабаб бўлган. 

- Профессионал фаолиятингиздаги битта мағлубиятни асосий омили нима бўлганди?

- Мағлубиятдан аввалги жангимга тайёргарлик кўриш жараёнида спарринг ўтказганмиз ва ўшанда қўлим синган, кучли зарбам спарринг шеригимни бошига текканди. Шундай бўлса-да, жангни рад қилмай қўлни авайлаб, 10 раунд ишлаб, ғалаба қозондим. Жангдан кейин яна қўлимни кўрсатдим, муолажалар бўлдику, навбатдаги жангим ҳам тез аниқ бўлди. Жароҳат тўлиқ тузалмаганди. Ютиб турган жойимда кучли зарба йўллаб, эски жароҳат яна қайталанди ва қўлим ишламай қолди. Шунинг учун жангни тўхтатишга мажбур бўлганмиз. Шу тариқа, ғалаба Манук Диланянга ёзилган.

- Жангларингизда ранг-барангликни гувоҳи бўламиз. Умуман қайси боксчини кўпроқ кузатасиз?

- Жаҳон боксида Сауль Альваресни жангларини қолдирмай кўриб бораман. Ўзимиздан эса Исроил Мадримовга ҳавас қилиб, уларни ҳаракатларидан баъзи жиҳатларни ўзлаштиришга интиламан.

- Қийин вазиятлар юзага келганда қандай омил сизга мотивация беради?

- Ота-онам, акам қўллаб-қувватлайди. Қишлоқда ўсганмиз қийинчиликлар жуда кўп бўлган, ушбу вазиятлар, қийинчиликдан чиқиб кетиш ҳислари мотивация беради.

- Юртимизда Рапқон бокс мактаби анчагина машҳурликка эришган. Буни мураббий,  ҳакам Рустам Мажидов номи билан боғлашади. Сиз бу борада қандай фикрдасиз?

- Биз ҳам ушбу мактабда тарбияланганмиз. Рапқон қишлоғида боксни ривожланишида Рустам ака Мажидовни хизматлари катта. Кўплаб чемпионлар етишиб чиққан. Ҳозирда ҳам уларнинг издошлари тарбияланмоқда.

- Ҳозирги кундаги промоутерингиз Жўрабек Чўлпонов борасида қандай фикрдасиз? Ушбу инсон жиддий, чемпионлик жангларини ташкил эта олишга қодирми?

- Жўрабек Чўлпонов яхши промоутер бўлиши баробарида ажойиб инсон. Албатта, катта жанглар ташкил эта олади. Май ойида навбатдаги жангларимизни ўтказамиз. Ушбу кечани ҳам промоутеримиз ўтказади. Рақиблар оддий бўлмайди. Насиб қилса, яхши натижалар қайд этамиз!

- Суҳбат учун раҳмат.Ўйлаймизки, ажойиб натижалар билан ўзбекистонлик бокс мухлисларини хурсанд қилишда давом этасиз.

- Эътибор учун раҳмат. Албатта, юртдошларимизни қўллаб-қувватлашлари билан яхши натижаларга эришамиз!