Мишель Соро билан реванш жанги бўладими? Исроил Мадримов жавоб берди

Хабарингиз бор, 2021 йил 17 декабрь куни Тошкентда Matchroom компанияси томонидан ташкил қилинган профессионал бокс кечаси бўлиб ўтди. Унда супер ярим ўрта вазн тоифасида жанглар ўтказиб келаётган Исроил Мадримов WBA якуний элиминатор жангида Мишель Соро устидан ғалаба қозониб, мажбурий даъвогар мақомини қўлга киритган эди. Эътиборли томони эса, жангда Мадримов рақибга кетма-кет кучли зарбалар йўллаши давомида ҳакам гонгни эшитмай қолганлиги натижасида тўхташ ишораси берилмади. Кўплаб кучли зарбадан кейин, ҳакам техник нокаут қайд этгани кўпчиликнинг эътирозига сабаб бўлди. Шундан сўнг, Соронинг жамоаси ташкилотга натижани бекор қилиб, реванш учун буйруқ беришни сўраган. Ҳозирда жараён қандай кетаётганлигига қизиққан ҳолда, Исроил Мадримовга бу борада мурожаат қилдик.

-Умуман фаолиятга оид қандай янгиликлар бор?

-Фаолиятимиз яхши давом этмоқда. Ҳозир машғулотларга киришганмиз. Спорт формамизни сақлаб турган ҳолатда асосан жисмоний тайёргарлик кўрмоқдамиз. Ҳозирча асосий мақсадимиз шу. Чунки Чарло ва Кастано ўртасидаги мутлақ чемпионлик жанги март ойида бўлиши керак. Шу жангни ҳам кутмоқдамиз.

- Мишель Соро апелляция берганди. Бу жараён қандай кечмоқда?

- Мишель Сорога келадиган бўлсак, у апелляция берган. Буни WBA ташкилоти ҳал қилади. Биз чемпионлик жангига ёки реваншга буйруқ бериладими, шуни кутмоқдамиз.

- Сиз WBA чемпионлик камарига расман даъвогарсиз. Кастано-Чарло реванш жанги ғолиби билан жанг қилишингиз керак аслида. Бу қанчалик амалга ошадиган иш ёки Соро билан реванш бўлиши ҳақида гап-сўзлар борми?

- Реванш жанги бўлиш эҳтимоли юқорироқ. Бир томони бу чемпионлик камари учун жангдан кейин бўладими, ёки олдинми бу ҳали номаълум. Фикримча, реванш жанги биринчи бўлиши эҳтимоли бор. Чунки бу вазнда иккита чемпион март ойида жанг ўтказадиган бўлса, WBA йўналиши биринчи бизга реванш бериши мумкин. Ҳозирда шуни кутмоқдамиз.