Можаро давом этяпти. Месси Бартомеу билан гаплашмай қўйган

“Барселона”ни тарк эта олмаган Лионель Месси ўзининг кетишига қаршилик қилган клуб президенти Жозеп Бартомеу билан гаплашмай қўйган, деб хабар тарқатмоқда Mundo Deportivo нашри.

Аргентиналик ҳужумчи Каталонияда қолишини эълон қилганига 15 кундан ўтган бўлса ҳам, ҳали бирор марта Бартомеу билан гаплашмади.

Лионель Месси Бартомеу ўзига нисбатан номардлик қилганини таъкидлаган эди. Мавсум давомида кетиш масаласини футболчининг ўзи ҳал қилишини айтган амалдор, якунда ўз сўзидан қайтганди.

Месси масаласи бўйича сўнгги хабарларда Бартомеу ҳужумчининг маошини камайтириш бўйича музокарага тайёргарлик кўраётгани айтилганди. Демак, томонларнинг илк учрашуви ва суҳбати Мессига ёқмайдиган мавзуда бўлади.