Монтелла "Рома" орзусидан Туркия терма жамоаси учун воз кечган

Туркия футбол федерацияси раҳбари Иброҳим Ҳожиосманўғли Винченцо Монтелланинг бир йил аввал терма жамоани тарк этишга яқин келганини маълум қилди.

Италиялик мутахассис Туркия терма жамоасини Евро-2024 чорак финалига олиб чиққан ва жамоага ЖЧ–2026 йўлланмасини ҳам тақдим этган.

Ҳожиосманўғлининг айтишича, Монтелла аввалги шартномаларига одатда "Рома" таклиф билан чиқса кетиш ҳуқуқини берувчи бандни киритган. Бироқ Туркия терма жамоаси билан тузилган келишувда бундай шарт бўлмаган.

"Биз Венгрияга қарши Миллатлар лигаси плей-офф ўйинларига тайёргарлик кўраётган вақтда “Рома”дан таклиф келди. Монтелла олдимизга келиб, бу таклифни кўриб чиқишни хоҳлашини айтди, айниқса плей-оффда натижалар яхши бўлмаса.

Бу жуда ҳурматли ёндашув эди.

Мен унга: "Мен шу ерда эканман, сиз билан ишлашда давом этамиз”, дедим. У эса доимо орзу қилиб келган жамоаси — “Рома”ни бошқариш имкониятидан воз кечди", — деди Ҳожиосманўғли Fanatik нашрига берган интервьюсида.