Моуриньо – бизнинг мураббий эмас. Мен “Реал”га суперюлдуз мураббий олиб келаман

Мадриднинг “Реал” клуби президенти лавозимига номзод Энрике Рикельме сайловолди ваъдаси билан чиқиб, жамоа бош мураббийлигига Жозе Моуриньо келишини  истамаслигини маълум қилди.

- Агар сайловда ғалаба қозонсак, “Реал”га суперюлдуз мураббийни олиб келаман. Сиз тасаввур қилиши мумкин бўлган энг буюк мураббийни.

Жозе Моуриньо – бизнинг мураббий эмас. Биз “Реал”нинг барча мухлислари ҳақиқатан ҳам хоҳлайдиган инсонни олиб келамиз, - деди Рикельме.

Номзоднинг сўзларини журналист Фабрицио Романо Х ижтимоий тармоғида келтирган.

Аввалроқ Мадриднинг “Реал” клуби амалдаги президенти Флорентино Перес кейинги сайловларда ғалаба қозонса, Жозе Моуриньони бош мураббий этиб тайинлашини маълум қилган эди.