Моуриньо жамоасига машҳур ҳимоячини чақирди

“Фенербаҳче” бош мураббийи Жозе Моуриньо клуб раҳбариятидан жамоа таркибини кучайтириш учун янги ўйинчи олиб беришни талаб қиляпти.

Маълумотларга қараганда, португалиялик мутахассис жамоага ўзи яхши биладиган эски таниши Мерих Демирэлни жалб қилмоқчи. У бу ўйинчи ёрдамида ҳимоя чизиғини кучайтиришни мақсад қилган.

Мерих аслида “Фенербаҳче” тарбияланувчиси ҳисобланади. Профессионал фаолияти давомида Туркиядан ташқари Португалия ва Италияда бир неча жамоаларда тўп тепган.

26 ёшли ҳимоячи айни пайтда Саудия Арабистонида “Ал-Аҳли” жамоасида ўйнаяпти. Унга “Бешиктош” ҳам қизиқиш билдирган. Бироқ, Жозе Моуриньо қўл остида ўйнаш имконияти Демирэлни қадрдош клубга қайтариши мумкин.