Моуриньо келишилган ўйинларга кўнмади

“Рома” бош мураббийи Жозе Моуриньо мавсумнинг муҳим палласида жамоаси олдидаги вазиятни таҳлил қилиб берди ва қолган учта учрашувда ҳам шогирдлари фақат ғалаба қозониш учун ўйнашини уқтирди.

- УЕФА Конференциялар лигаси финали бизни чемпионатда қолган иккита учрашувимиздан чалғатмаслиги керак. “Рома” бор эътиборини олдидаги охирги бир жуфт ўйинга қаратиши шарт.

Ҳозир мен мавсумни бешинчи ёки олтинчи ўринда якунлашни истайман. А Сериянинг бўлажак икки ўйинида биз бу мақсадимизга етиш учун қўлимиздан келганини қилишимиз лозим.

Табиийки, таҳлилчилардан мусобақа жадвалидаги жойлашувларга  тегишли турли тахмин ва таҳлилларни мен ҳам эшитяпман. Уларга кўра, биз мавсумни саккизинчи ўринда якунлаб, лекин Конференциялар лигасининг финалида зафар қучиб, келаси мавсумда Италиядан саккизта жамоа Еврокубокларда қатнашишини таъминлашимиз керак экан.

Албатта, саккизта клубнинг халқаро турнирларга чиқиши Италия футболи учун фантастик натижа бўлади.

Лекин бу натижа худди биз каби машаққатли меҳнат қилаётган клубларга нисбатан адолатсиўлик ва ҳурматсизлик эвазига бўлмаслиги керак.

Бизга “Венеция”ни мағлуб этиш жуда катта аҳамият касб этади. Чунки бу бизга керак бўлган муҳим очколарни келтиради. Қоларвеса, бўлажак учрашув жорий мавсумдаги ўз майдонимизда ўйнайдиган охирги ўйинимиз. Мухлисларимизга байрам туҳфа қилиб, чемпионатнинг сўнгги беллашуви олдидан вазиятни ўзимиз назорат қилиш имконияга эга бўлишни истаймиз.

Таркибда жиддий ўзгаришлар қилишимни кутманг. Табиийки, бир-икки янгиликлар бўлиши мумкин, бироқ ҳозир таркибда тубдан ўзгариш қиладиган вазият эмасю

Генрих Мхитарян ҳамон жароҳатидан тикланяпти. Биз уни мавсумнинг сўнгги палласида тезроқ сафга қайтишини кутяпмиз. Лекин Мхитарян Конференциялар лигаси финалида бизга ёрдам беради, деб аниқ айтолмайман.

Бизнинг ажойиб мухлисларимиз бор. “Венеция” билан бўладиган ўйиндан кейин уларни қутлаб, ўз миннатдорлигимизни изҳор қиламиз. Ҳаммамиз майдонни айланиб чиқиб, уларга бўлган эҳтиром ва эътиборимизни намойиш қиламиз. Бу мавсум улар бизни фантастик даражада қўллаб-қувватлади, - деди Жозе Моуриньо.  

УЕФА қоидаларига кўра, кучли бешлик чемпионатларидан бири бўлган А Серияда дастлабки тўртт ўринни эгаллаган жамоалар келаси мавсум Чемпионлар лигасида қатнашади. Моуриньо кўзлаётган бешинчи ва олтинчи ўрин эгалари Европа лигасига йўлланма олади. Еттинчи ўрин соҳиби эса Конференциялар лигасида ўйнайди. “Рома” ўтган йили еттинчи поғонани банд этгани учун бу мавсум илк бор ташкил этилган Конференциялар лигасида тўп сурмоқда.

Шунингдек, Конференциялар лигаси ғолибига ҳам Европа лигасининг навбатдаги мавсуми учун йўлланма берилади.

“Рома” Конференциялар лигаси финалида Нидерландиянинг “Фейеноорд” жамоасига қарши майдонга тушади. Ҳал қилувчи ўйин 25 май куни Албаниянинг Тирана шаҳрида бўлади.

Унга Жозе Моуриньо шогирдлари 14 май куни “Олимпико”да “Венеция”ни қабул қилади ва чемпионатнинг охирги турини 22 май куни Туринда “Торино”га қарши ўтказади.

Айни пайтда А Серия мусобақа жадвалида Европа лигасининг икки йўлланмасига жами тўрт жамоа даъвогарлик қилмоқда. Римнинг иккинчи клуби – “Лацио” 62 очко билан бешинчи поғонада турган бўлса, уни таъқиб қилаётган “Аталанта”, “Рома” ва “Фиорентина” ҳисобида 59 тадан очко бор.

Чемпионлар лигасининг кейинги мавсумида Италия шарафини А Сериянинг кучли тўртлигидаги ўринларини кафолатлаб бўлган “Милан”, “Интер”, “Наполи” ва “Ювентус” жамоалари ҳимоя қилади.

Ўруновни олиш учун премьер-лигада ўйнаш керак!

“Рома”нинг пўстагини қоқамиз!

Шомуродов, энди сенга янада қийин бўлади!