Моуриньо клубни Европа гегемонига айлантирадиган суперлойиҳани барбод қилди!

“Челси”нинг собиқ техник директори Майкл Эменало ўзи ишлаган даврда клуб хўжайини Роман Абрамоқичга суперлойиҳа таклиф қилганини ва уни Жозе Моуриньодан ташқари ҳамма қўллаб-қувватлаганини айтиб берди.

- Биз истиқболли лойиҳа яратдик ва ўша даврдаги энг зўр ёш ўйинчиларни таклиф қилдик. Азар, Мата, Оскар, Де Брюйне, Ромелу Лукаку ва Муҳаммад Салоҳ. Бу футболчилар билан узоқ йиллар Англия ва Европада гегемонлик қилиш мумкин эди ва биз айнан мана шу йўналишда ҳаракат қилдик. Жараён ишга тушганди.

Жозе Моуриньо қайтиши билан ҳаммаси бир лаҳзада ўзгариб кетди. Чунки у келган вақтнинг ўзидаёқ ғалаба қозонишни истади ва истиқболли лойиҳамиз тўхтатилди. Бу жуда қийин давр эди, жамоа ўзгаришларга кўникиши, ёш ўйинчилар янги бош мураббий уларга бошқача муносабатда бўлишини тушуниб етиши қийинчилик туғдирарди.

Моуриньо келганидан кейин қўлга киритган совринлар биз бой берган истиқболли жамоанинг ўрнини босолмайди. Барбод бўлган лойиҳамиз амалга оширилганда “Челси” етти-саккиз йил давомида ҳамма турнирларда ғолиб чиқарди, ўша даврдаги енгилмас “Барселона”дан ўзиб кетарди, - деди Майкл Эменало.