Моуриньо "Рома" футболчиларини очиқчасига танқид қилди

"Рома" бош мураббийи Жозе Моуриньо жамоасининг баъзи футболчиларининг ўйин даражасидан норози эканлигини айтмоқда.

Римликлар А Сериянинг сўнгги учта ўйинида бор-йўғи 2 очко қўлга киритишди. Бугун Моуриньо шогирдлари ўз майдонида "Торино"ни мағлуб эта олмади (1:1), сўнгги дақиқалардаги Матичнинг голи "бўрилар"ни мағлубиятдан қутқариб қолди.

"Баъзи жамоаларда жуда кўп ажойиб ўйинчилар бор. Шундай футболчилар бизнинг таркибда ҳам жуда кўп. Лекин бизда натижа йўқ. Яширмайман, айрим футболчиларимиз ҳозир жуда паст савияда футбол ўйнашмоқда. Яхшиямки, танаффус келди. Бу кўпчилик учун ўз ўйинларини баҳолаш ва хулоса чиқариш учун тўғри вақт", — деди португалиялик ўйиндан кейин DAZN нашрига берган интервьюсида.