Моуриньо Шомуродовдан воз кечдими?
А Сериянинг ўтган турида Жозе Моуриньо шогирдлари юқори ўринлар учун курашдаги асосий рақобатчиларидан ҳисобланган “Аталанта”ни мағлубиятга учратди. Бу ғалабадан сўнг Жозе Моуриньо ва шогирдларининг кайфияти аъло.
Энди римликлар ўз олдиларига қўйилган яна бир вазифа – УЕФА Конференциялар лигаси бош совринини қўлга киритиш учун плей-офф босқичида Нидерландиянинг “Витесс” жамоасига рўбарў келади.
Нимчорак финалнинг биринчи учрашуви сафарда – рақиб майдонида бўлади.
Нидерландияликлар бу босқичга тасодиф туфайли етиб келди. Конференциялар лигасидаги юришини саралаш босқичидан бошлаган “Витесс” дастлаб, Ирландиянинг “Дандолк” жамоасини 2:2, 2:1 ҳисобида енгди. Кейинги босқичда нидерландияликлар Бельгиянинг “Андерлехт” футболчиларини ортда қолдирди – 3:3, 2:1.
“Витесс” гуруҳ босқичида Англиянинг “Тоттенхэм”, Франциянинг “Ренн” ва Словениянинг “Мура” клублари билан баҳслашиб, учта ғалаба, битта дуранг ва икки мағлубият билан иккинчи ўринни банд этди. Тасодиф шундаки, иккинчи йўлланмага асосий даъвогар бўлган “Тоттенхэм” коронавирус пандемияси туфайли “Ренн” билан бўладиган ўйиндан бош тортди ва УЕФА лондонликларга теехник мағлубият ёзди.
Томас Леч шогирдлари ўтиш босқичида Австриянинг “Рапид” клуби билан тўқнаш келди. Дастлабки ўйинда 2:1 ҳисобида имкониятни бой берган нидерландияликлар жавоб баҳсида жавобсиз иккита тўп киритиб, нимчорак финалга чиқди.
“Рома” ҳам халқаро турнирдаги иштирокини саралашдан бошлаб, икки ўйин натижасига кўра, Туркиянинг “Трабзонспор” клубини мусобақадан чиқариб юборди. Туркиядаги ўйинда Элдор Шомуродов “Рома”даги дастлабки голини урди ва жамоасининг 2:1 ҳисобидаги ғалабасини таъминлади. “Олимпико”да Моуриньо шогирдлари туркларга ҳеч қандай имконият қолдрмади – 3:0.
Гуруҳ босқичида Рим “бўрилари” Норвегиянинг “Будё-Глимт”, Украинанинг “Заря” ва Болгариянинг ЦСКА клубларини ортда қолдириб, биринчи ўрин эгаси сифатида тўғридан тўғри нимчорак финалга йўл олди.
Айни пайтда хориж матбуоти бўлажак баҳс таҳлили ҳақида турли маълумотларги чиқармоқда. Уларнинг аксарияти “Рома”нинг имкониятини юқори баҳолаётгани ҳам бор гап. Манбаларнинг маълум қилишича, Жозе Моуриньо Нидерландиядаги учрашувда ҳам “Аталанта”га қарши қўллаган ғалабали тактикадан фойдаланишни режалаштираётган экан. Ҳар ҳолда машғулотлар айнан ана шу тактикага мослаб ташкил этилди.
“Витесс” учун бу жуда муҳим ўйин бўлади. Чунки Арнем шаҳри шарафини ҳимоя қилаётган бу клуб миллий чемпионат жадвалининг ўртасида бормоқда ва улар Еврокубокларда иштирок этиш ҳуқуқини қўлга киритиши учун Конференциялар лигасида бош совринни ўзиники қилиши керак. Арнемликлар 40 очко билан еттинчи поғонада бормоқда ва Нилерландия чемпионатида кучли тўртликка кирган клубларга халқаро майдонда мамлакат шарафини ҳимоя қилиш ҳуқуқини инобатга олсак, “Витесс” бу мавсум юқори ўринлардан четда қолиши аниқроқ. Зеро, “Витесс” чемпионат якунланишига тўққизта тур қолган бир паллада тўртинчи ўринда бораётган “АЗ Алкмаар”дан 11 очкога ортда қоляпти.
Биз учун қизиғи эса, Элдор Шомуродовнинг майдонга тушиши экани ҳеч кимга сир эмас. Бироқ, Моуриньо “Ювентус”га қарши аламни мағлубиятни ҳали ҳам унутмаган кўринади. Португалиялик мутахассис ўша ўйиндан кейин легионеримизга ишонч билдирмай қўйди. Ҳатто, мураббийнинг кўзини чалғитиб, тунги клубларда юргани учун асосий таркибдан ҳайдалган Феликс Афена-Гьян ҳам “Аталанта”га қарши ўйинда қатнашди. Лекин Шомуродов тобора майдондан узоқлашиб бормоқда.
As-roma сайти Жозе Моуриньо “Витесс”га қарши баҳсда Элдор Шомуродовга ишонч билдирмаслигини маълум қилди.
- “Рома” ҳужумида Тэмми Абрахам ва Николо Дзаньолога рақобатчи йўқ. Агар бу икки ўйинчи майдонда бўлса, Шомуродовнинг ўйнаши ҳақида гап-сўз бўлиши мумкин эмас. Карлес Перес ҳам бу схемага бегона. Бу шароитда энг кўп имконият бериладигани ёш футболчи Феликсдир. Шундай экан, “Рома” ёзда ҳужум чизиғини учайтириши учун яхши савиядаги форвард олиши керак бўлади, - деб ёзмоқда мазкур сайт.
“Витесс” – “Рома” учрашуви Тошкент вақти билан 10 март куни соат 22:45да бошланади.
Фикрлар