Франциянинг кучли жамоаси “Рома” ҳужумчисини аниқ сотиб олади! У ким экан?
Франция чемпионатида пешқадам ПСЖни таъқиб қилиб келаётган “Ницца” клуби раҳбарияти “Рома”дан ижарага олинган Жастин Клюйвертнинг трансфер ҳуқуқини тўлиқ сотиб оладиган бўлди.
Жастин Нидерландия футболининг яқин ўтмишдаги юлдузи Патрик Клюйвертнинг ўғли. У ҳам отаси сингари олдинги чизиқда тўп тепади. Жастин универсал футболчилар тоифасига киради, ҳар икки қанотда, ҳужум марказида ва ҳужумкор ярим ҳимоячи позицияда ўйнай олади.
Бу ўйинчи “Аякс” тарбияланувчиси ҳисобланади. 2018 йили илк бор легионер сифатида “Рома” билан шартнома имзолаган. Рим клубида жами 53 та учрашувда майдонга тушиб, рақиблар дарвозасини беш маротаба ишғол қилди.
Клюверт икки йилдан бери ижарада ўйнаяпти. Дастлаб, “Лейпциг” сафида тўп тепган ҳужумчи Бундеслигада 19 та баҳсда ўз ҳисобига учта гол ёздириб қўйди.
Жозе Моуриньо “Рома”ни қабул қилиб олганидан кейин нидерландиялик футболчини асосий таркибга жалб қилмади ва у бу гал “Ницца”га ижарага берилди. Томонлар ўртасидаги келишувга кўра, футболчи “Ницца”нинг ўйинларидан тенг ярмида қатнашса ёки жамоа Чемпионлар лигасига йўлланма олса, францияликлар уни тўлиқ трансфер қилишига тўғри келади.
22 ёшли футболчининг “Ницца”да кўрсатаётган ўйини мураббийлар штабига маъқул келмоқда. Ҳозирча барча турнирларда 20 та учрашувда қатнашган Клюйверт бешта гол ва тўртта ассист муаллифи бўлди. Жамоа Франция чемпионатида иккинчи ўринда бормоқда ва сўнгги турда ПСЖни мағлуб этиб, мусобақа жадвалидаги мавқеини мустаҳкамлади.
“Рома” раҳбарияти ҳам Жозе Моуриньога керак бўлмаган ўйинчини сотиб, даромад қилишга қарши эмас. Ҳозирги шароитда ҳужумчининг трансфери 14 миллион евро атрофида баҳоланмоқда.
МЮ ўйинчиси “Рома”ни танлади
“Манчестер Юнайтед” ҳимоячиси Диогу Далот асосий таркибга кира олмаётгани учун бошқа клубга ўтишни режалаштираётган эди.
Португалиялик истеъдод эгаси бир неча клублар нишонида турибди. Айниқса, Италия чемпионати вакилларидан “Рома” ва “Фиорентина” уни ўз сафига қўшиб олишга анчадан бери ҳаракат қилмоқда.
Журналист Николо Скиранинг хабар беришича, Далотнинг ўзи ҳам А Серияга қайтишга қарши эмас. Энг мақбул вариант сифатида “Рома”га қўшилиши айтилмоқла. Чунки “Рома” бош мураббийи Жозе Моуриньо “Манчестер Юнайтед”ни бошқарганида Далот унинг қўл остида премьер-лигада дебют қилган ва улар дўстона алоқаларни сақлаб қолган.
22 ёшли португалиялик ҳимоячи ўтган мавсумда ижара асосида “Милан”да тўп тепди. Миланликлар уни сотиб олмоқчи бўлган паллада манчестерликларнинг ўша пайтдаги бош мураббийи Уле-Гуннар Сульшер ўйинчининг кетишига рухсат бермади.
Диогу Далотнинг манчестерликлар билан шартномаси келаси йили якунланади. У жорий мавсумда премьер-лига ўйинчиларида атиги 15 маротаба майдонга тушди. Далотнинг трансфер суммаси 12 миллион еврога баҳоланмоқда.
Моуриньо Ламелага омад тилади
Жозе Моуриньо “Севилья” ярим ҳимоячиси Эрик Ламеланинг сафга қайтгани билан табриклади.
Маълумки, ҳужумкор футболчи ўтган йили елкасидан оғир жароҳат олиб, узоқ муддат даволанишга мажбур бўлганди.
Буюк Коко, сен ўйингга қайтганингдан хурсандман. Бу мавсумнинг якуний палласи олдидан сен ва “Севилья” учун ажойиб янгилик бўлди. Сизларга энг яхши тилакларимни тилайман, - деб ёзди Жозе Моуриньо ижтимоий тармоқлардаги саҳифасида.
Аргентиналик футболчи 2011 йили “Ривер Плейт”дан “Рома”га ўтган эди. Рим клубида 12 йиллик фаолиятидан кейин “Тоттенхэм”га йўл олди. Моуриньо Лондон клубини бошқарган даврда Ламела“шпорлар”нинг етакчиларидан бири эди.
Эрик ўтган йили ёзда эркин агент сифатида “Севилья”га кўчиб ўтди. Испан клуби сафида 16 та учрашувда майдонга тушиб, ўз ҳисобига тўртта гол ва иккита ассист расмийлаштирди.
Фикрлар