Моуриньога "Реал"дан ҳали расмий таклиф йўқ

Жозе Моуриньога "Реал Мадрид" томонидан ҳозирча ҳеч қандай расмий таклиф келиб тушмаган. Бу ҳақда "Sky Sports News" хабар бермоқда.

Аввалроқ клуб президенти Флорентино Перес португалиялик мутахассисни яна Мадридга қайтариш ғоясига қизиқиш билдиргани айтилганди. Айни пайтда у янги бош мураббий излаш жараёнини бошқармоқда, чунки январ ойида Хаби Алонсо ўрнига тайинланган Альваро Арбелоа мавсум якунида лавозимини тарк этиши кутилмоқда.

Маълумотларга кўра, Перес ва Моуриньо ўртасида яқин муносабатлар сақланиб қолган ва клуб раҳбари 63 ёшли мутахассис билан яна ҳамкорлик қилишдан манфаатдор. Бироқ ҳозирча "Бенфика" бош мураббийи билан ҳеч қандай расмий алоқа бўлмаган ва у ўз келажаги борасида шошилмаяпти.

Моуриньо ўз номи атрофидаги барча миш-мишлардан хабардор, жумладан, унинг "Реал" рўйхатида экани ҳақидаги тахминлардан ҳам. Аммо у айни пайтда асосий эътиборини "Бенфика" олдидаги вазифаларга қаратмоқда.

Шунингдек, мутахассиснинг Португалия клубида қолиш эҳтимоли ҳам истисно этилмаяпти.

Моуриньo 2010–2013 йилларда "Реал"ни бошқарган ва бу даврда жамоа билан Испания чемпионати, Кубоги ва Суперкубогини қўлга киритган.