Моуриньонинг “курсиси қимирлаб” қолди, Римда эса катта “зилзила” ёхуд “Рома” раҳбарияти оғзида битта мураббий номи бонг урилмоқда

Моуриньонинг ишлари яхши эмас. Рим клуби раҳбарияти янги мураббий ҳақида ўйламоқда

Моуриньонинг шартномаси 2024 йилда якунига етади, бироқ сўнгги ҳафталарда унинг Римни тарк этиши мумкинлиги ҳақида гап кетмоқда. Муаммо шундаки, “бўрилар”нинг эгаси ҳисобланган “Friedkin Group” команияси португалиялик мутахассисга ортиқ ишонмаяпти.

“Рома” яқинда Рим дербисида имкониятни бой берди. Инкор этиб бўлмайдиган тахмин бу мавсум ҳам исботланмоқда. Яъни, клуб шу темпда ўйнашда давом этса, “бўрилар” бу йил ҳам Чемпионлар лигасисиз қолиши мумкин. Моуриньо ва унинг жамоаси ўтган якшанба куни дербидаги муваффақиятсизликдан кейин вазиятни издан чиқариб юборгандек кўринмоқда ва уни тўғирлаш учун янги мураббий топишлари керак. Кеча, чоршанба куни “Сассуоло”га қарши ўйин ўтказиб, тўртинчи ўрин учун курашни давом эттириши керак эди. Аммо римликлар тайёр ғалабани қўлдан чиқарган ҳолда ўз имкониятларини янада пасайтириб юборди. Агар клуб кеча сафарда ғалаба қозонганида, тўртинчи ўринга чиқиб олишлари учун яхши имкон бор эди, аммо бу қўлдан чиқарилди. Ҳозирда “Рома” 14-турдан кейин 26 очко билан 6-поғонада кетмоқда.

Шуни ҳам таъкидлашимиз керакки, муаммо фақат турнир жадвалидаги ҳолатда эмас, балки Рим клуби эгаси ҳисобланган Фридкин ва Жозе Моуриньони боғлаб келган яхши муносабатлар ўртасига тушган кичик совуқчилик ҳамда бир қатор муаммолардир. Америкалик инвестор “Рома”ни Римдаги, балки Италиядаги энг зўр клуби эканлигини исботлаши қўйиш учун “Special One”ни танлади, аммо уларнинг муносабатларда кичик муаммолар пайдо бўлмоқда. Португалияликнинг мутахассиснинг нималарга қодирлигини ҳаммамиз яхши биламиз, аммо Жозе ҳамон топ даражадаги мураббий эканлигини исботлаши учун унга чемпионлар керак.

Ҳаммаси ўзгариши мумкин. Моуриньонинг Римдаги сафари қаридими?

Муаммо Моуриньонинг ўзида эмас, балки у истаган футболчиларни “Рома”га олиб келинмаганидадир. Сўнгги бир ярим йил ичида Жозе клуб учун борини берди, баъзи ёш иқтидорларни майдонга туширди ва таркибдаги бор футболчилардан максимал тарзда фойдаланишга ҳаракат қилди. Муаммо шундаки, “Рома” португал мураббийи талабларига жавоб бера оладиган футболчини харид қилмаяпти. Агар буни Сарри ва Спалетти билан солиштирганда, орадаги катта фарқни англаб олишингиз мумкин бўлади.

Сўнгги ҳафталарда томонлар шартномани узайтириш ҳақида миш-мишлар тарқалмоқда. Моуриньо ва “Рома” ўртасидаги келишув 2024 йилда, келаси мавсум охирида тугайди. “Sportitalia.it” нашрига маълум бўлишича, жаҳон чемпионати вақтида Хорхе Мендеш ва Тиаго Пинто ўртасида шартномани янгилаш эҳтимоли бор ёки йўқлигини аниқлаш учун учрашув бўлиб ўтиши керак.

Фридкинлар “Special One”нинг ўрнига Тухелни тайинламоқчи

Аслида, “Рома”нинг “шорт-листи”дан ўрин олган мураббийлар рўйхати катта эмас, аммо клуб бир қанча номзодларни тайёрлаб қўйган. Агар “Ньюкасл” Рим клубининг эшигини яна тақиллатса, балки бу сафар жавоб бошқача бўлади! Боиси, араблар қўлига ўтган инглиз клуби бошқарувига Жозенинг келиши ҳақидаги миш-миш анча пайтдан бери Рим осмонида сузиб юрибди. Фридкинлар тайёргарликсиз қолишни истамайдилар ва агар ҳозирдан (Чемпионлар лигасига йўлланма олмасдан) вазият ёмонлашса, улар “Рома” мураббийлик ролига кимни олиб келишни яхши билишади.

Фридкиннинг оиласида анчадан бери айланиб юрган исм — Томас Тухель. Немис мураббийи 7 сентябрь куни Загребнинг “Динамо”сидан 0:1 ҳисобида мағлубиятга учраганидан сўнг “Челси” бошқаршувидан озод қилинди ва ҳозиргача ишсиз. 49 ёшли “Боруссия” Дортмунд ва ПСЖнинг собиқ устози Европа Чемпионлар лигасида иштирок этиш борасида катта тажрибага эга, қолаверса Клопп томонидан футболга олиб кирилган немис мутахассислари “новелла”сини тўлиқ ўзлаштира олди. “Гегапрессинг” деб аталадиган ғоя Италия футболи учун ҳам мос тушиши мумкин ва буни “Рома”да синаб кўришга Ден ва Раян Фридкинлар қарши бўлмаса керак.

Ҳозирча, бу фақат бизнинг  тахминларимиз. Аммо Италияда Моурнинг “Рома”ни тарк этиши ҳақида хабарлар аллақачон тарқалган, эҳтимол навбатдаги муваффақиятсизлик Жозе учун Римдаги ҳикояни якунига айланиши мумкин.  

Жамшидбек Маҳмудов