Муҳаммад анчагача футбол ўйнолмайди

Англия Премьер-лигасида иштирок этаётган “Тоттенхэм”нинг ҳужумкор футболчиси Муҳаммад Қудус сон мушагидан олган жароҳати сабабли уч ойдан ортиқ вақт давомида футбол ўйнолмайди.

Қудус Премьер-лига доирасида “Сандерленд”га қарши ўтказилган учрашувнинг 19-дақиқасидаёқ майдонни тарк этишга мажбур бўлди.

Энди 25 ёшли ганалик футболчи майдонга фақат март ойидаги халқаро танаффусдан кейин, Премьер-лига 11 апрелдан қайта бошлангачгина қайтиши мумкин.

- Афсуски, ўтказилган қўшимча тиббий кўрик давомида Муҳаммад Қудуснинг шикастланиш даражаси кутилганидан жиддийроқ бўлиб чиқди. Биз уни март ойидаги халқаро танаффусдан кейин қайтишини кутяпмиз, - деди “Тоттенхэм” бош мураббийи Томас Франк.

Эслатиб ўтамиз, Муҳаммад Қудус ўтган ёз 55 миллион фунт стерлинг эвазига “Вест Хэм”дан “Тоттенхэм”га кўчиб ўтган эди. Ҳужумкор футболчи “шпорлар” сафига қўшилганидан буён жорий Премьер-лигада иккита гол ва бешта ассист муаллифи бўлди.