Мундиал олдидан ажойиб рейтинг: Ҳусанов ва яна 18 футболчи!

Футбол жамоатчилиги 2026 йилги жаҳон чемпионатининг бошланишини кутмоқда. Илк бор уч мамлакат – АҚШ, Мексика ва Канада биргаликда мезбонлик қиладиган мундиалда 48 та миллий терма жамоа баҳсга киришади.

Айни пайтда иштирокчи жамоалар охирги тайёргарлик босқичини ўтамоқда. Спорт манбалари эса, ўз мухлисларига турли-туман қизиқарли маълумотларни етказмоқда.

Айна шундай фактлардан бири қайси клуб мундиалга энг кўп футболчи юборгани ҳақида бўлди.

Маълум қилинишича. 2026 йилги жаҳон чемпионатида “Манчестер Сити”дан энг кўп футболчи иштирок этади. “Шаҳарликлар” Шимолий Америкадаги мундиалда қатнашадиган 12 та мамлакат миллий терма жамоасига жами 19 нафар футболчисини юборган. Хусусан, улар қаторида Ўзбекистон миллий терма жамоаси марказий ҳимоячиси Абдуқодир Ҳусанов ҳам бор.

Янгича рейтингнинг кучли бешлиги қуйидагича кўриниш олди:

1. “Манчестер Сити” — 19 футболчи, 12 терма жамоа;
2. “Бавария” — 18 футболчи, 10 терма жамоа;
3. “Арсенал” — 16 футболчи, 10 терма жамоа;
4. “Пари Сен-Жермен” — 16 футболчи, 9 терма жамоа;
5. “Барселона” — 15 футболчи, 8 терма жамоа.

Яна бир машҳур клуби – Мадриднинг “Реал” жамоаси бу кўрсаткич бўйича 13-ўринни эгаллаб, 9 та терма жамоага 10 нафар футболчи юборди. Қизиғи шундаки, Испания миллий терма жамоасига “Қироллик клуби”дан бирорта футболчи жалб қилингани йўқ.

2026 йилги футбол бўйича жаҳон чемпионати 11 июндан 19 июлга қадар АҚШ, Канада ва Мексика яшил майдонларида бўлиб ўтади.

Бу тарихда биринчи марта бир вақтнинг ўзида уч давлат мезбонлик қиладиган жаҳон чемпионати бўлади. Турнирда жами 104 та учрашув ўтказилади ва 48 та миллий терма жамоа иштирок этади.

Ўзбекистон миллий терма жамоаси тарихий чемпионатда “К” гуруҳидан жой олган бўлиб, плей-оффга чиқиш учун Криштиану Роналду бошчилигидаги Португалия, Луис Диас ва Хамес Родригес етакчилигидаги Колумбия ва жисмонан бақувват ижрочилардан ташкил топган Конго Демократик Республикаси терма жамоалари билан рақобатлашади.