ФИФА Ҳусановга алоҳида тўхталди!
2026 йилги жаҳон чемпионатининг асосий ташкилотчиси – Халқаро футбол федерацияси (ФИФА) мундиал учун якуний таркибларни эълон қилди ва қуйидагича расмий баёнот берди.
ФИФА томонидан жамоаларнинг якуний таркиблари эълон қилингач, рекорд даражадаги 48 мамлакат вакили бўлган 1248 нафар футболчининг турнирда иштирок этиши тасдиқланди.
Жаҳон юлдузларидан тортиб дебютантларгача бўлган футболчиларни ўз ичига олган таркиблар футболнинг мислсиз даражадаги хилма-хиллиги ва бутун дунё бўйлаб қамровини намоён этмоқда.
Лионель Месси, Криштиану Роналду ва Гильермо Очоа ўз фаолиятларидаги тарихий олтинчи жаҳон чемпионатида иштирок этишга тайёрланмоқда.
Канада, Мексика ва АҚШда ўтадиган турнирда 104 та ўйин бўлиб ўтади ва уларда 48 та терма жамоа ҳамда рекорд даражадаги 1248 нафар футболчи иштирок этади.
Ушбу чемпионат жаҳон футболи тарихида бурилиш нуқтаси бўлади. Чунки у ҳар қачонгидан ҳам кўпроқ мамлакатлар, футболчилар ва мухлислар учун эшикларни очиб беради.
Тасдиқланган таркиблар турнирнинг кўлами ва унинг доимий оммабоплигини яна бир бор намоён қилди. Жами 357 нафар футболчи камида бир марта жаҳон чемпионатида қатнашган ҳолда яна миллий жамоаси таркибига қайтди.
Шу билан бирга, тахминан 891 нафар футболчи мусобақада илк бор иштирок этади. Бу эса жаҳон футболида ҳам давомийлик, ҳам янгиланиш жараёни мавжудлигини кўрсатади.
Футболчилар ёшидаги фарқ ҳам диққатга сазовор. Турнирнинг энг ёши катта иштирокчиси шотландиялик Крейг Гордон бўлиб, у 43 ёшу 162 кунлик. Энг ёш ўйинчи эса мексикалик Гильберто Мора бўлиб, у 17 ёшу 240 кунликдир.
Жами 20 ёшга тўлмаган 22 нафар футболчи ва 40 ёшдан ошган етти нафар футболчи турнирга жалб қилинган. Шунингдек, аввалги жаҳон чемпионатларида ғолиб бўлган 22 нафар футболчи ҳам яна жаҳон саҳнасига қайтмоқда.
Машҳур юлдузларнинг яна бир бор қатнашиши билан бир қаторда, ушбу турнир янги авлод футболчилари ва мамлакатларига ҳам эътибор қаратмоқда.
Кабо-Верде, Кюрасао, Иордания ва Ўзбекистон миллий терма жамоалари ўз тарихида биринчи марта ФИФАнинг энг нуфузли мусобақасида майдонга тушади. Бу кенгайтирилган формат жаҳон футболи учун янада кенгроқ имкониятлар яратаётганини кўрсатади.
Энг ёрқин воқеалардан бири – Ўзбекистоннинг жаҳон саҳнасидаги тарихий дебютидир. Бу ерда Абдуқодир Ҳусанов каби ёш юлдузлар ўз ватанларидаги орзуларни рўёбга чиқаришга муваффақ бўлди.
Янги авлоднинг бошқа ёрқин вакиллари сифатида франциялик Уоррен Заир-Эмери, янги зеландиялик Финн Сурман ва марокашлик Билал Эл-Ханнус ҳам бор.
Шу билан бир вақтда аргентиналик Лионель Месси, Португалия терма жамоасининг рамзи Криштиану Роналду ва Мексика дарвозабонлари афсонаси Гильермо Очоа ўзларининг рекорд даражадаги олтинчи Жаҳон чемпионатида иштирок этиш учун тайёргарлик кўрмоқда.
Тасдиқланган таркиблар замонавий футболнинг глобал хусусиятини ҳам намоён этмоқда. Уларда 71 мамлакатдаги 449 та турли клуб вакиллари бор.
Бу клублар қуйидаги конфедерацияларга мансуб:
- ОФК (Осиё) — 14 мамлакат;
- КАФ (Африка) — 6 мамлакат;
- КОНКАКАФ — 7 мамлакат;
- КОНМЕБОЛ — 8 мамлакат;
- ОФК (Океания) — 1 мамлакат;
- УЕФА (Европа) — 35 мамлакат.
Жамоалар таркиби миллий футбол тизимлари ўртасидаги фарқларни ҳам кўрсатиб бермоқда.
Масалан, Қатар ва Саудия Арабистони терма жамоалари деярли тўлиқ маҳаллий чемпионатларда ўйнайдиган футболчилардан ташкил топган. Ҳар икки терма жамоа таркибидаги 26 ўйинчидан 25 нафари миллий лигада ҳаракат қилади.
Бошқа томондан, Кабо-Верде, Конго Демократик Республикаси, Кот-д’Ивуар, Кюрасао, Сенегал ва Уругвай терма жамоалари эса таркибни фақат хориж чемпионатларида тўп сураётган футболчилардан шакллантирган.
Мураббийлар ҳақида гап кетганда, Гана терма жамоаси бош мураббийи Карлуш Кейруш ўзининг кетма-кет бешинчи жаҳон чемпионатида иштирок этмоқда.
У аввал:
- Португалия терма жамоасини 2010 йилда;
- Эрон терма жамоасини 2014, 2018 ва 2022 йилларда бошқарган.
Шу тариқа у 1986–2002 йиллардаги натижани қайд этган Бора Милутиновичдан кейин кетма-кет бешта жаҳон чемпионатида қатнашган иккинчи мураббийга айланди.
Тасдиқланган таркиблар ушбу турнирни ҳақиқатан ҳам ноёб қиладиган жиҳатларни ўзида мужассам этган - бу футбол орқали маҳорат, хилма-хиллик ва бутун дунё бирлигининг ҳақиқий байрамидир.
Фикрлар