Мундиалда Файзуллаев скаутлар назарига тушишини истайман!

Ўзбекистон миллий терма жамоаси ва Туркиянинг “Истанбул Башакшеҳир” жамоаси ҳужумкор футболчиси Аббосбек Файзуллаевнинг биринчи устози Дмитрий Ан 2026 йилги жаҳон чемпионатида қатнашаётган шогирдига ўз тилакларини билдирди.

- Аббосга, энг аввало, жароҳатларсиз ўйнашни тилайман. Жаҳон чемпионатида у ўзининг креативлиги, тез фикрлаши ва тўп билан ҳаракатларини намойиш қилиб, жамоага фойда келтиришини истайман.

Уни скаутлар пайқашини хоҳлайман. Менимча, унда кучли ҳаяжон бўлмайди, чунки мен уни яхши биламан, бу борада у ўзини қўлга ола олади, - деди Дмитрий  Ан Россиянинг championat.com нашри мухбири Александр Ершов билан суҳбатда.

Бундан ташқари, тажрибали мураббий Ўзбекистон миллий терма жамоасининг ўзи учун тарихий ҳисобланган биринчи жаҳон чемпионатидаги иштироки бўйича ҳам ўз фикр-мулоҳазалари билан ўртоқлашди.

- Мен Ўзбекистон терма жамоасининг гуруҳдан чиқишини кутаман. Имконият бор. Менимча, айрим футболчиларда ҳаяжон бўлади, аммо тажрибалироқ ўйинчилар тўғри тайёргарлик кўриб, ўз ўйинларини кўрсатишади.

Менинг назаримда, барча жамоаларни енгиш мумкин, энг муҳими – тўғри кайфият, иштиёқ, омад ва рақибдан қўрқмаслик.

Гуруҳ яхшироқ ҳам бўлиши мумкин эди, бундан оғирроқ ҳам. Биз терма жамоамизни қўллаб-қувватлаймиз, ахир бу жаҳон чемпионатидаги илк иштирок. У ерда мухлисларимиз армияси жуда катта бўлади, - деди Дмитрий Ан.

АҚШ, Канада ва Мексика мезбонлик қилаётган 2026 йилги футбол бўйича жаҳон чемпионатида Ўзбекистон миллий терма жамоаси “К” гуруҳидан чиқиш учун курашади.

18 июнь куни Ўзбекистон терма жамоаси биринчи учрашувини Мексикадаги “Ацтека” стадионида  Колумбияга қарши майдонга тушади.

23 июнь куни Португалия  ва 28 июнь куни эса Конго Демократик Республикаси билан бўладиган баҳслар АҚШ стадионларида ўтказилади.

Эслатиб ўтамиз, 22 ёшли Аббосбек Файзуллаев футболчилик фаолияти давомида клублар миқёсида Тошкентнинг “Пахтакор” ва Москванинг ЦСКА клубларида ўйнаб, 2025 йилнинг ёзида Туркиянинг “Истанбул Башакшеҳир” клубига ўтган.

Аббосбек Ўзбекистон миллий терма жамоасидаги дебютини 2023 йилнинг 11 июнида нишонлаган ва шундан бери халқаро миқёсда 32 та учрашувда рақиблар дарвозасини саккиз маротаба ишғол қилган.