Мундиалда ўйнашнинг ўзи катта ютуқ!

Ўзбекистонда хизмат кўрсатган журналист, Ўзбекистон журналистика ва оммавий коммунакациялар университети ректори Шерзодхон Қудратхўжа Ўзбекистоннинг мундиалдаги иштирокига муносабат билдириб, энг муҳими ўзбек йигитларининг футбол оламининг энг нуфузли мусобақасида ўйнаётганининг ўзи катта ютуқ эканини таъкидлади.  

- Бугун тарихий кун, Ўзбекистон-Португалия ўйини, Файзуллаев ва Роналду тўқнашуви,  жажжи Исфандиёрнинг катта феномени нимада? Бугун биз судья ё имтиҳончи домла бўлмайлик! Тўп эса думалоқ, майдон эса текис…

Бугунги ўйин португаллар учун бу Конго билан ўйналган сенсацион дурангдан (1:1) кейин ўзини оқлаш имкони. Ҳозирча Португалия 1 очко билан учинчи ўринда, Ўзбекистон эса очкосиз охирги ўринда турибди. Ўзбекистон Колумбияга 1:3 ҳисобида мағлуб бўлди, аммо тарихий гол урилди — Аббосбек Файзуллаев ЖЧда гол урган биринчи ўзбек футболчисига айланди.

Португалия таркибида юлдуз футболчилар – Роналду, Бруну Фернандеш, Жоау Невеш, Бернарду Силва, Витинья, Диогу Кошта кабилар бор. Уларнинг футбол бозоридаги умумий қиймати бир миллиард евродан ошиқ.

Бизнинг юлдузларимиз – Шомуродов, Файзуллаев, Ўрунов, Ҳусанов. “Манчестер Сити” аъзоси Абдуқодир 50 миллион еврога баҳоланган терма жамоанинг энг қиммат ўйинчиси. Ўзбекистон миллий терма жамоасининг жами бозор қиймати – 85 миллион евродан ошган.

Гуруҳдан чиқиш учун бизга Португалия билан камида дуранг ва Конго Демократик Республикаси устидан ғалаба керак!

Шунинг учун биз йигитларимизга фақат омад ва ғалаба тилайлик!, - дейди Шерзодхон Қудратхўжа.

Шерзодхон Қудратхўжанинг фикрлари билан ушбу ВИДЕОЛАВҲАДА танишишингиз мумкин.