Мундиалнинг энг кекса футболчиси фаолиятини якунлади

Шотландия терма жамоаси дарвозабони Крейг Гордон профессионал футболчи сифатидаги фаолиятини якунлаганини эълон қилди. 43 ёшли посбоннинг таъкидлашича, у «ўз орзуси билан яшаган», аммо энди нуқта қўйиш пайти келган.

- Бу кун келишини ҳеч қачон истамаганман, лекин у барибир келиши керак эди. Мен орзуларимни рўёбга чиқарганман, бундан жуда миннатдорман, — деди Гордон унинг илк клуби томонидан эълон қилинган хайрлашув видеомурожаатида.

- Йиллар давомида ёнимда бўлган жамоадошларим, мураббийлар, тиббий ходимлар, яқинларим ва мухлисларга чуқур миннатдорлик билдираман. Энди қўлқоплар ечилди, футболчи сифатидаги фаолиятим билан хайрлашаман, — дея қўшимча қилди у.

Гордоннинг сўнгги мавсуми «Хартс» таркибида ўтди. У шунингдек, Шотландия терма жамоасининг 2026 йилги жаҳон чемпионати учун тузилган рўйхатига ҳам киритилган эди. Дарвозабон миллий жамоа сафида жами 84 ўйин ўтказган.

Крейг Гордон профессионал фаолиятини айнан «Хартс»да бошлаган. 2007 йили эса у «Сандерленд» сафига ўтди. У ерда 2010 йилда «Болтон» футболчиси Зат Найтнинг яқин масофадан йўллаган зарбасини қайтариб, Англия чемпионати тарихидаги энг ёрқин сейвлардан бирига муаллиф бўлгани билан эсда қолган.

2014 йили Шотландияга қайтган Гордон «Селтик» жамоаси дарвозасини қўриқлай бошлади ва клуб билан бирга 5 марта мамлакат чемпиони бўлди. 2022 йили дарвозабон оғир жароҳат — оёғининг икки жойидан синишини бошидан кечирди, шунга қарамай, тикланиб, яна майдонга қайтишга муваффақ бўлди.