"Мураббий сифатида ҳали ҳеч ким эмасман" ёхуд Анвар Бердиев нега "Нефтчи"ни эмас, балки "Шўртан"ни танлади?

Ғузорнинг “Шўртан” клубида ўзгаришлар юз бергани тўғрисида сайтимиз орқали хабар бердик. Бош мураббийликка Алексей Евстафеев тайинланди. Анвар Бердиев эса ёрдамчи мураббий сифатида иш бошлади.

Ўтган йили Бердиев “Турон”ни бошқарганини яхши эсласангиз керак. Эндиликда “Шўртан”да фаолиятини бошлади. Лекин бу сафар бош мураббий ролида эмас.

- “Шўртан”да ёрдамчи мураббий сифатида иш бошладингиз. Клубдан тушган таклифга рози бўлишингиз учун узоқ ўйламадингизми?

- Авваламбор, “Шўртан” раҳбариятига мени таклиф қилишгани учун раҳмат демоқчиман. Бу ерга келишимдан олдин “Нефтчи” U-21 жамоасидан ҳам таклиф тушганди. “Нефтчи” жамоасининг янги президенти Мансуржон Тошматов билан ҳам бу масалада 2-3 марта кўришиб гаплашдик. У ерда Азиз Алижонов ишлаётгани учун рози бўлмадим. Аммо “Нефтчи” мен учун жонажон клубим. Алижоновнинг ўрнига боргим келмади. Клуб раҳбарига таклиф учун миннатдорчилик билдираман. “Нефтчи”га омад тилайман. Олдинги мавқеига қайтишига ва яна Осиё Чемпионлар лигасида иштирок этишига тилакдошман. “Шўртан”дагилар менга дарҳол айтишдики, бош мураббийликка Евстафеевни чақирганмиз, аммо сизни ҳам ёрдамингиз керак, про лигада ишлагансиз, деб айтишди. Мен ҳали ҳеч ким эмасман. Мураббийлик ишини яқинда бошлаганман. Бош мураббийлик қилиш учун про лицензия ҳам керак. Ўтган йили про лицензияси учун ўқиш бошланса, унисини ҳам, бунисини ҳам тенг олиб борамиз. деб ўйлагандик. Аммо бундай бўлмади. Чин кўнгилдан Евстафеевга ёрдам бериб, ишни бошладик. Қўлимдан келганича “Шўртан”га ёрдам беришга тайёрман.

- Ўтган йили “Турон”ни бошқариб, озми-кўпми жамоани Суперлигага қайтишида ўз ҳиссангизни қўшдингиз. 2023 йилда яна про лигадасиз ва бу сафар иккинчи мураббий ролида. Балки, ушбу ҳолат сиз учун мураббий сифатида бироз орқага чекинишдир. Албатта, про лицензия йўқлиги ҳам роль ўйнаяпти.

- Бунда ҳеч қанақа муаммо кўрмаяпман. Яхши футбол ўйнаганмиз-у, бироқ мураббий тариқасида ҳали ҳеч нарса қилганим йўқ. Бу борада ўрганишим керак бўлган нарсалар кўп. Ёрдамчи мураббий сифатида ишлаб бош мураббийдан ўзимга керакли билимларни олишга ҳаракат қиламан.

- “Шўртан” йиллар давомида муаммолар гирдобида қолаётганди. Охирги пайтларда клубда ижобий ўзгаришлар кўзга ташланяпти. Нима деб ўйлайсиз, “Шўртан” қачон Суперлига учун тайёр бўла олади?

- Яқин йиллар ичида менимча “Шўртан” Суперлигага чиқиш вазифасини қўяди, деб ўйлайман. Айтганингиздек, клуб қарздорлик гирдобига тушиб қолганди. “Шўртан” ҳақида энди ҳамма яхши фикрда. Ҳеч кимдан қарздорлиги қолмаган. Худо хоҳласа, яқин йиллар ичида “Шўртан” аввалги мавқеини тиклайди, деган умиддаман.

- Алексей Евстафеев билан биринчи марта ишлаяпсиз. Ўзаро тил топишиш қандай кечяпти?

- Евстафеевнинг футболчилик даврини биламан. Яхши ўйинчи бўлган. Мураббий сифатида ёшлар терма жамоаларида ишлаган. Унинг ўзига яраша иш йўналиши бор. Менинг биринчи ишим – бу жамоа манфаати йўлида хизмат қилиш. Биргалашиб, жамоани аввалги даражасига қайтарсак бундан жуда хурсанд бўламан.

- Таркибда жиддий ўзгаришлар бўладими?

- Ўтган йилги таркибдаги футболчилар бор. Кўз остимизга олиб қўйган ўйинчилар ҳам мавжуд. Барибир таркибни кучайтиришга ҳаракат қиламиз.

- Чемпионатга тайёргарлик кўриш бўйича йиғин режаси қандай?

- Биринчи йиғинимиз 28 январгача Ғузорда бўлади. Бу ерда барча шароитлар аъло даражада. Қолгани яна режага қараб амалга ошади.

Шуҳратбек Жўраев.