Мурод Алиев: "Бунёдкор"да ишлаш ҳамма учун шараф бўлиши керак"

Бир неча кун олдин “Бунёдкор” клуби раҳбариятида ўзгариш бўлди. Бунга қадар ОКМКда фаолият кўрсатиб келган мутахассис Мурод Боқиевич Алиев эндиликда “Бунёдкор” бош директори сифатида фаолият олиб боради.

Маълумки, Алиев 2017-2019 йиллар мобайнида ҳам “Бунёдкор” бош директори лавозимида ишлаган. Орадан бир неча йил ўтгач, Мурод Боқиевич собиқ жамоасига қайтди. Алиев “Бунёдкор”га қайтганидан кейинги илк интервьюсини Sports.uz сайтига берди.

- Мурод Боқиевич, “Бунёдкор” бош директори этиб тайинланганингиз билан табриклаймиз. Ҳаммаси қандай юз берди?

- Бўш жойга таклиф бўлди. “Ўзбекнефтгаз” раҳбарияти мени чақирди, суҳбатлашдик. Олдинги иш фаолиятим билан танишишди. Ҳаммасини инобатга олиб, мени шу клубга лойиқ кўришди. Суҳбатлашганимиздан сўнг вазифалар қўйишди. “Бунёдкор”ни кўпроқ жаҳон ареналарида танитиш, Ўзбекистон чемпионатида совринларни қўлга киритиш учун нималар қилиш кераклиги борасида гаплашдик. Ниятимиз жамоани янада кучайтириш. Иқтидорли футболчиларни кўпайтириш. Бунгача кўплаб истеъдод эгалари “Бунёдкор”дан етишиб чиққан. Отабек Шукуров, Элдор Шомуродов...Бундай ўйинчилар роса кўп. Фақат тўхтаб қолмаслик керак. Ёшларга эътиборни бундан ҳам ошириш даркор. Легионерларга келсак, насиб қилса, улардан кўра янада кучлироғини олиб келиш лозим бўлади. Чунки хориждан ўйинчи чақирилганида улардан нимадир ўрганиш керак. Тўғриси, охирги пайтларда Ўзбекистон чемпионатига келаётган легионерларни ўзимизни футболчилардан икки карра кучли, дейишдан йироқдаман. Шундан келиб чиқиб, бир-иккитаси билан хайрлашяпмиз. Жамоага келсак, ҳаммада шартнома бор, охиригача бирга ишлаймиз. Мурод ака келди деб бошқалар билан шартнома бекор қилинмайди. Албатта, ўзини кўрсатганлар яна чиройли тарзда ишини давом эттираверади. Натижа бўлмаса албатта спортда ниманидир ўзгартириш керак. Олдимизда “Пахтакор” билан “Қизилқум”га қарши ўйинларимиз бор. Шуларга тайёрланамиз. Шундан кейин иккинчи даврага тайёргарлик кўрамиз ва жамоани кучайтириш ҳозирги кундаги вазифамиз. Мураббийларга тўхталсак, ҳаммаси футбол ўйнаган. Уларга ҳам ишонч билдириляпти ва буни оқлашади, деган умиддаман.

- “Бунёдкор” бош директори сифатида ишга киришганингиздан кейин ишни нимадан бошладингиз?

- Жума куни расман эълон қилишди ва шу кундан бошлаб ишлаяпман. 2-3 кун ичида ниманидир ўзгартириш қийин нарса. Ҳозирги пайтда ҳужжатлар билан танишиш жараёнидамиз. Жамоада 3-4 йил олдин ишлаган пайтимдаги мураббийлар ҳам, ўйинчилар ҳам бор. Мени ҳозирги кундаги вазифам, аввало ҳаммасини эшитиб, муаммоларини кўриб, қаерда қанақа камчиликлар борлигини билиб, шундан кейин нима қилишни ҳал қиламиз. Асосий таркибда қаердадир ўзгариш қилиш мумкин. Аммо бирданига катта ўзгариш қилиб бўлмайди. Ҳаммада шартнома бор. Яхши ўйинчиларни ҳеч ким қўйиб юборгиси келмайди. Айрим футболчиларимизни клубга қайтариш бўйича иш олиб бориляпти. Ҳамма нарса ҳал бўладиган бўлса, таркибни кучайтиришимиз керак. Максимал равишда курашамиз. Жамоа олдига кучли учталикка кириш вазифаси қўйилган. Иккинчи асосий масала, бу ёшларимизга эътибор. Биринчи лига, ёшлар лигаси ва академиямиз жамоалари ҳам бор. Улар четда қолиб кетмаслиги керак. Яна вилоятларда мусобақалар ўтказиб, иқтидорли болаларни жалб қилмоқчимиз.

- Сир бўлмаса, қайси легионер билан хайрлашяпсизлар?

- Бу биргина мени фикрим бўлиши керак эмас. Жамоа билан, мураббийлар билан гаплашамиз. Ҳаммани фикри бор. Мен битта ўзим ҳал қилмайман. Бу ерда кенгаш билан маслаҳатлашган ҳолда иш тутамиз. Масалан, ким келади, ким кетади, барча билан бафуржа маслаҳат қилиб, иш кўрамиз. Яъни, бошқалар билан ҳам фикрлашган ҳолда ҳал қиламиз.

- “Бунёдкор”да Мурод Отажонов ва Ҳикмат Ҳошимов тандеми иш олиб боряпти. Сиз келгач, энди мураббийлар штабида ҳам қандайдир ўзгариш кўришимиз мумкинми? Масалан, Алиев “Бунёдкор”га ўтяпти, деган хабарлар фонида Илҳом Мўминжоновни ҳам ушбу клубда иш бошлаши мумкинлиги хусусида гап-сўзлар тарқалди.

- Йўқ, йўқ. Бу нарса муҳокама қилинмаган. Тўғри, 5:0 ҳисобидаги мағлубият оғир бўлди. Аммо унгача натижалари ёмон кетмаётганди. Биласиз, футболда 2-3 та учрашувда натижа ўхшамаса мураббий ўз хоҳиши билан ариза ёзиб кетади. Бу ерда ҳеч қанақа муаммо бўлмаслиги керак. Ўйлайманки, вазият бунгача етиб бормайди. Ҳали бу ҳақида қандайдир режа ҳам йўқ. Улар ўз ишини давом эттиришяпти. Биринчидан, Мурод Отажоновда про лицензия бор. Ҳикмат Ҳошимовда эса ҳали про лицензия йўқ. Иккаласи бир-бирини тушуниб, маслаҳат қилган ҳолда иш олиб боришяпти. Айрим машғулотларини кузатдим, ёмон эмас. Амаллаб иккита ўйинимизни ўтказиб олсак, ўйлайманки, иккинчи даврага яхши тайёргарлик кўрамиз. “Бунёдкор” ўйинида нимадир бор. Жамоада ўйин мазмуни кўриниб турибди. Хабарингиз бор, мураббийлар жамоага мавсум бошланиши арафасида қўшилишди ва уларга маълум миқдорда вақт етмаган бўлиши мумкин. Агар бу мураббийларга олдиндан бириктирилиб, вақт берилганида балки бошқача таркиб йиғишлари мумкин эди. Ҳаттоки, Туркияга кетишаётганида Иван Бошкович қолган ва бош мураббийсиз кетишганди. Шуни ҳам инобатга олишимиз керак, деб ўйлайман. Кейин таркибдан айрим футболчилар кетишди. “Пахтакор”, “Навбаҳор” ёки ОКМКдаги таркибга нисбатан савия бўйича бироз пастроқ бўлиши мумкин. Боя айтганимдек, Мурод ака келиб ҳамма нарсани ўзгартириб юборди, деган гап бўлмайди. Ҳаммани шартномаси бор ва охиригача ишлаймиз. Қолганини вақт кўрсатади. Аравани барчамиз биргаликда тортамиз. Агар кимдир бўшлик қилиб торта олмаса, унда хайрлашишимизга тўғри келади.

- Мавсум бошида “Бунёдкор”дан “Навбаҳор”га ўтган ва ҳозирда у ердан ҳам кетиши мумкин деб айтилаётган Фарруҳ Икромовни яна “Бунёдкор”га қайтариш масаласи борми?

- Ҳали мен Бабаян билан гаплашганим йўқ. Лекин гаплашишим керак. Футболчи у ерда етарли даражада ўйин амалиётига эга бўлмади. Икромов бизнинг ўйинчимиз ва яна шу ерда ўйнашга хоҳиши бор. Муаммоларини гаплашиб, қайтара олсак, унга ишончимиз катта. Ҳаммани хабари бор, “очилаётган” пайтида терма жамоада жароҳат олди. Ҳалигача ўзининг спорт формасига қайтгани йўқ. Балки “Бунёдкор”га қайтса имконият берилиб, “очилиб” кетар. “Навбаҳор”да кучли футболчилар йиғилган, уларга қўйилган вазифасига яраша ҳар бир учрашувда натижа муҳим саналади. Вазифаси юқори. Фарруҳга берилаётган ўйин вақти камлик қилаётгандир. Икромов яна формасини тиклаб олса, нафақат “Бунёдкор”, балки бундан ўзбек футболи ҳам ютади. Худо хоҳласа, муаммо бўлмайди, деган умиддаман.

- Бунгача ОКМК клубида фаолият олиб бордингиз. Бу жамоани тарк этишингиз қийин кечмадими?

- Ростини айтсам, ҳали жамоа билан хайрлашмадим, вақтим бўлгани йўқ. Аммо уларга бораман деганман. Албатта, ОКМК клубидагилар билан хайрлашиб келишим керак. Миржалол Қосимов, мураббийлар штаби, бутун жамоа билан албатта хайрлашиб қайтаман. Шунча йил бирга ишладик, раҳбарият билан ҳам, ҳамма билан ҳам бир-биримизни яхши тушунамиз. Мени тўғри тушунишади, деган умиддаман. Ҳозир бу ердаги иш жараёни катта. Ҳар доим “Бунёдкор”да бошқача қаралган. Бу жамоани ўз ўрни бор. Нафақат ўйин, балки футболчиларни ўзларини тутиши, қанақа мураббийлар ишлаяпти, улар бунга лойиқми, келажакда уларни қўлидан қандай истеъдодлар чиқади, мана шундай масалаларга ҳам эътибор беришимиз керак. Ўйлайманки, “Бунёдкор”даги шароит анча-мунча клубларда йўқ. Ҳаммасидан унумли фойдаланиш керак. “Бунёдкор”га шунчаки келиб-кетмаслик керак. Бу ерда ишлаш ҳамма учун шараф бўлиши керак. Футболчиларга “Бунёдкор” тушунчасини етказишимиз лозим. Ҳали уларда бундай тушунча йўқ. Уларни тарбиялайсиз ва имконият берасиз. Эртага бошқа клуб чақирса, югуриб кетади. Бу ерда шартнома масаласи ҳам бор. Бир пайтлари Андрей Шевченкони “Динамо” Киевдан “Милан”га роса кўтарилган пайтда сотишган. Ваҳоланки, уни ёшлигада ҳам кўплаб гранд клублар сўрашган, аммо сотишмаган. Футболчи ҳам клуб билан шартномасини узайтириб, вақти келганда қаергадир сотиш орқали ўзи ҳам жамоамга фойда келтиришим керак, деган тушунчада бўлиши керак. Ундан келадиган трансфер пулига клуб манфаати йўлида ишлатамиз. Буни ўйинчилар қалбига сингдиришимиз керак. Ваҳоланки, ҳозир бундай нарсаларни кўрмаяпман. Олдин ҳам кўрмагандим. Ёш футболчилар оёққа туриб, чопқиллаб кетгунча...Ўйинчи доим ўзини оёққа турғазган жойини ҳам ўйлаши керак-да!

Шуҳратбек Жўраев.