Мурод Отажонов: "Бир очко қўлга киритдик ёки икки очко йўқотдик, очиғи билмайман"

Ўзбекистон Суперлигаси 6-туридан ўрин олган "Бунёдкор" - "Насаф" баҳси якунланди. Унда томонлар 1:1 ҳисобида дурангга имзо чекди. 

Учрашувдан сўнг ташкил этилган матбуот анжуманида "Бунёдкор" бош мураббийи Мурод Отажонов иштирок этди ва қуйидаги фикрларни билдириб ўтди.

"Ҳаммага катта раҳмат! Ўйин жуда қизғин ва жанговор тарзда кечди. Қийин баҳс бўлиши аниқ эди ва шунақа ҳам бўлди. "Насаф" кучли жамоа эканини исботлай олди. Бу каби учрашувлар чемпионатимиз савиясини оширади. Йигитларга ҳам ўз миннатдорчилигимни билдираман. Улар охиригача жанг қилишди ва керакли 1 очкони қўлга киритишди. 

Футболчиларимнинг характери ҳар хил. Уларни назорат қилишга ҳаракат қиламиз. Аммо футболда ҳиссиётлар жунбушга келиши табиий ҳолат, менимча. 

Иккинчи рақам остида ўйнашимиз вазиятга қараб танланади. Дастлаб биринчи таймда 3 марказий ҳимоячи билан ҳаракат қилдик, сўнгра ҳужумкорлик билан ҳаракат қилдик ва 2 марказий ҳимоячини қолдирдик. 

Бир очко қўлга киритдик ёки икки очко йўқотдик, очиғи билмайман. Ўйин сценарийсидан келиб чиқиб, ҳаммаси кескин ўзгариб кетиши мумкин эди.