Муроджон Аҳмадалиев ўз вазн тоифасидаги жаҳон чемпионини жангга чақирди

26 апрель куни АҚШда мексикалик Карлос Карлсонни мағлуб этиб, WBA рейтингида пешқадамга айланган ўзбекистонлик Муроджон Аҳмадалиев ўз вазн тоифасидаги Жаҳон чемпиони ҳисобланган Даниэл Романни рингга чақирди.

­­- Жангимдан сўнг Роман-Доҳени беллашувини томоша қилдим. Роман ва унинг жамоаси айнан менга тегишли WBA унвонига асосий даъвогар бўлиб турганимни қабул қилмаётган бўлишса-да мен уларнинг бирлашишига қаршилик кўрсатмадим. Лекин энди бундай бўлмайди, ҳимояланиш вақти келганини эслатиб қўймоқчиман. Дэни Доҳенига қарши жангда ўзининг шиддат ва характерини яққол намоён этди. Жанг ҳақиқатан ҳам зўр бўлди. Аммо энди иккимиз учун ҳам ҳақиқий синов вақти келди. Мен тайёрман, умид қиламанки, у ҳам. Ҳақиқий мексикалик мардлар қийинчиликдан қўрқишмайди. Биз иккимиз сентябрда ҳақиқий жанг оқшомини кўрсатиб, барчага ким кучли эканини кўрсатиб қўямиз.

Маълумот учун, Даниэл Роман 26 апрел куни супер ўрта вазн тоифасида IBF камари учун  ирландиялик Теренс Жон Доҳенига қарши ўтказилган жангда рақибидан очколар ҳисобига устун келди. Шунингдек, 28 ёшли боксчи фаолияти давомида 30 та жанг ўтказиб, шулардан 27 тасида ғалаба қозонган (10 таси нокаут). Шунингдек, унинг ҳисобида 2 та мағлубият ва 1 та дуранг ҳам бор.