"Мухлисларимиз худди уйимизда ўйнаётгандек муҳитни юзага келтирдилар, энг зўр ўйинимиз олдинда" - Водий дербисида қаҳрамонлик кўрсатган "Андижон" дарвозабони яна нималар деди?

“Андижон” водий дербисида Фарғонада “Нефтчи”га қарши муҳим учрашувда дуранг ўйнади. Айниқса, “Бургутлар” посбони Игорь Литовка чинакам қаҳрамонлик кўрсатди. У бир неча бор жамоасини муқаррар голлардан сақлаб қолди.

Шу куни чиндан ҳам Литовка энг зўри эди. Шу боис футболчига бир қатор саволлар билан мурожаат қилдик.

- Игорь, водий дербисидаги учрашувдан қандай таассуротлар олдингиз?

- Албатта, ўйиндан олган таассуротларимга таъриф бера олмайман. Майдонда бошқача, ҳар қандай кишини тўлқинлантириб юборадиган муҳит ҳукм сурди. Айниқса, бизни қўллаш учун бу ерга етиб келган мухлисларимиз худди уйимизда тўп сураётгандек муҳитни юзага келтира олдилар. Ҳа, барчамиз бу водий дербиси эканлигини ҳис қилдик. Бир сўз билан айтганда, иккала клубнинг мухлислари бу оқшом стадионда қойилмақом муҳитни юзага келтира олдилар. Бундай шароитда борингни бериб футбол ўйнагинг келади холос. Юқорида мухлисларимизнинг қўллаб-қувватлашлари жуда бўлакча бўлганини бежиз айтиб ўтмадим. Шунингдек, ўйинимизни телевидение орқали томоша қилган ишқибозларимизга ҳам миннатдорчилик билдирмасдан ўта олмайман. Биз ютамизми ёки йўқ, доимо бирга бўлишимиз керак, деб ҳисоблайман.

- Сиз ўйиннинг энг яхши футболчисига айландингиз. Бундай эътирофни кутганмидингиз?

- Кимнидир алоҳида ажратиб кўрсатиш мушкул. Бутун жамоа борини бериб ўйнади. Биз бир жамоамиз. Ғалаба ҳам, мағлубият ҳам фақат жамоаники бўлади.

- Умуман, натижа беллашувга мос бўлдими?

- Ҳа, натижа ўйинга мос бўлди, деб ўйлайман. Эҳтимол, майдон эгалари бизга нисбатан кўпроқ хавфли вазиятларни юзага келтирган бўлишлари мумкин. Аммо бизда ҳам ўйиннинг биринчи ва иккинчи бўлимида голлар уриш учун жуда яхши имкониятлар юзага келди. Агар гол урсак майдон эгаларига жуда қийин бўлар ва мағлубиятга учратишимиз ҳам ҳеч гап бўлмасдан қоларди. Биласиз, “Нефтчи” чемпионат бошланганидан бери ҳали кураги ерга теккани йўқ. Бу жамоанинг ёқимли сериясини тўхтатган рақиб биз бўлсак ажойиб иш амалга ошарди. Умуман олганда, дербидаги натижани ижобий дея баҳолашим мумкин.

- Сиз ўйинга қўшимча кучни қаердан олдингиз? Чунки жамоани бир неча бор муқаррар голлардан сақлаб қолдингиз?

- Ўзгача муҳит ҳукмронлик қилаётган майдонга чиқиш ҳар қандай футболчига ижобий таъсир кўрсатмасдан қолмайди. Ўз навбатида бу муҳит ўйинчининг кучига куч қўшади. Жамоамиз мухлислари учун курашдик. Ахир улар ортимиздан бу ерга бизни қўллаб-қувватлаш учун етиб келдилар. Фурсатдан фойдаланган ҳолда Фарғонага келган “Андижон”нинг минглаб мухлисларига катта раҳмат айтаман.

- Кейинги учрашув ҳам водий дербиси номи остида ўтади ва “Навбаҳор”га қарши муҳим ўйин бор. Бўлажак баҳс олдидан нималарни айтган бўлардингиз?

- Навбатдаги беллашув бугунгисидан ҳам қизиқарли ўтишига ҳеч қандай шубҳам йўқ. Чунки “Навбаҳор” Осиё Чемпионлар лигасида ўйнамоқда. Ўзаро баҳсимиз олдидан улар таркибида Неймар, Кулибали каби жаҳон таниган футболчилари бўлган “Ал Ҳилол” билан куч синашадилар. Дербида “Навбаҳор”га ҳақиқий жангни тақдим этишга ҳаракат қиламиз. Боз устига ўз майдонимизда тўп сурамиз. Учрашувгача ҳали анча бор. Шу боис беллашувга пухта тайёргарлик кўришга улгурамиз. Навбатдаги водий дербисида жонкуяр ишқибозларимизни хурсанд қилиш учун максимум кучимиз билан тўп суришга тайёргарлик кўрамиз.

- Нима деб ўйлайсиз, бу сизнинг энг яхши ўйинингизмиди?

- Ўйлайманки, мавсумдаги энг зўр ўйинимиз ҳали олдинда. Чунки ҳисобимизда яна 8 та ўйин бор. Бу беллашувларни яхши савияда ўтказа оламиз, деб ҳисоблайман.

Шуҳратбек Жўраев.