"МЮ билан "Арсенал" "Барса"нинг жароҳатдаги футболчисига кўз тикишмоқда

«Барселона» клуби ҳужумчиси Усмон Дембеле фаолиятини Англия премьер-лигасида давом эттириши мумкин. «Diario Sport» тарқатган хабарларга қараганда, франциялик 22 ёшли футболчига «Манчестер Юнайтед» ва «Арсенал» клублари қизиқиш билдирмоқдалар.

Ҳозирча иккала клуб ҳам Дембелени қўлга киритиш учун фақат илк қадамларни ташлади холос. Чунки инглизларни Усмоннинг жароҳатларга ўта мойиллиги ташвишга солмоқда. «МЮ»дагилар ҳам, «Арсенал» вакиллари ҳам айни пайтда Дембеленинг муаммоларини ўрганиб чиқишмоқда ва бу даражадаги кўп жароҳат ниманинг эвазига юзага келаётганини аниқлашга уринишмоқда.

АПЛнинг иккала иштирокчисига айни пайтда ҳужумкор футболчи керак. Шу сабабли Усмоннинг муаммоларини бартараф этиш имкони борми ёки йўқми, аниқлик киритиш мақсадида ҳужумчига доир маълумотларни ўрганиб чиқишмоқда. Ўз навбатида, «Барселона» клуби ҳам Усмонни сотишга тайёр эканлигини маълум қилган. Лекин шу билан бирга уни худди Фелиппе Коутиньо сингари ижарага бериб юборилиши эҳтимолдан ҳоли эмас.

Манбада ёритилишича, Дембеле «Манчестер Юнайтед»даги ҳамюрти Антони Марсьяль билан боғланиб, Манчестердаги ҳаёт тарзи ва унинг таассуротлари билан қизиққан. Дембеле Каталония суперклубидаги сўнгги ўйинини ўтган йилнинг 27 ноябрь куни ўтказган эди. Жорий мавсумда франциялик футболчи Ла Лига доирасида атиги 5 та ўйинда иштирок этиб, рақиблар дарвозасини 1 марта ишғол этди холос.