MYu o‘yiga etgunicha, “Lester” ishni bitirmoqchi

“Lester” rahbariyati anchadan buyon “Manchester Yunayted” ko‘zlab yurgan futbolchini o‘z safiga chorlamoqda.

“Tulkilar” shu kunlarda “Bornmut” yarim himoyachisi Devid Bruks agentlari bilan aloqaga chiqib, muzokarani boshlab yubordi. “Lester” bir necha kun ichida futbolchi transferi bo‘yicha rasmiy taklifini yuboradi.

23 yoshli yarim himoyachiga “Manchester Yunayted” ham ko‘z tikmoqda. Sulsher “Borussiya”dan Jeydon Sanchoni olib kelishning imkoni topilmasa, uning o‘rniga aynan Bruksni olishni mo‘ljallayotgan edi.

Angliya premer-ligasini tark etgan “Bornmut” esa etakchi futbolchilarini sotish orqali moliyaviy ahvolini o‘nglab olishi kerak.