МЮ таркибда кучайтиришда давом этмоқда. Куньядан сўнг яна бир футболчи билан келишувга эришилди

"Манчестер Юнайтед" ёзда ҳужум чизиғини кучайтиришга эътибор қаратмоқда ва "Брентфорд" етакчиси Браян Мбемога ишонч билдирди. 
 
Журналист Флориан Плеттенбергнинг маълум қилишича, манкунианликлар раҳбарияти тез орада камерунлик ярим ҳимоячи трансфери бўйича расмий музокараларни бошлайди. Қайд этилишича, футболчининг ўзи "қизил иблислар" сафига ўтишга принсипиал розилик берган. Қолаверса, клуб ва футболчи ўртасида бўлажак шартнома шартлари бўйича оғзаки келишувга эришилган. МЮдагилар келишув барбод бўлмаслигига ишонишмоқда. 
 
Мбемо 2024/2025 йилги мавсумни ажойиб ўтказди ва "Брентфорд"нинг энг яхши тўпурари бўлди. Унинг ҳисобида барча мусобақалар бўйича 42 та ўйинда 20 та гол ва 9 та голли узатма бор.