МЮ Варанни 500 млн еврога сотиб олиши мумкин

Мадриднинг "Реал" клуби ўзининг франциялик ҳимоячиси Рафаэль Варанни "Манчестер Юнайтед"га сотишни хоҳламади. Бу ҳақда Daily Express нашри хабар тарқатмоқда.

Юқоридаги манбаага кўра “қизил иблислар” 26 ёшли футболчининг трансфери масаласида “қироллик клуби”га расмий таклиф билан мурожаат қилишган, аммо рад жавобини олишган. Аниқроғи, мадридликлар Варан сотилмаслигини айтишган.

Энди МЮ Варанни фақатгина бир йўл билан ўз сафига қўшиб олиши мумкин. Гап шундаки, премьер-лига гранди француз футболчиси учун унинг шартномасида кўрсатилган 500 млн евро товон пулини тўлаш эвазига у билан шартнома имзолаши мумкин. Бироқ, бунинг имконсиз эканлигини инобатга олсак, Варан янги мавсумни ҳам “Реал”да ўтказади.

Маълумот учун, Варан ўтган мавсум “Реал” сафида жами 43та ўйинда майдонга тушди ва ўз ҳисобига 2та гол ёздириб қўйишга эришди. Унинг клуб билан амалдаги шартномаси эса 2022 йилга қадар имзоланган.